СЫЛНЫМУТ

Весела кумылым пӧлекла

У книга

Весела кумылым пӧлекла

Кодшо кечылаште мыскарам ыштылаш,  калыкым воштылташ йӧратыше еҥ-влаклан келшыше «Тыгай паша – томаша» книга  савыкталт лекте. Авторжо – Илья Ёлкин. Тиде мыскарачын кумшо книгаже. Чаманаш веле кодеш, Илья Васильевич шкеже кодшо ийын май мучаште ош тўня дене чеверласыш. Мыскаражым, койдарчыкшым, весела сценкыже-влакым  книгаше вес мыскараче йолташыже, Сергей Карпов, чумырен.

Илья Ёлкин Советский район Васташуй ялыште шочын. 1969-1970 ийлаште хоровой обществе пелен баянист-хоровик-влакым ямдылыме индеш тылзаш курсым тунем лекмек, 27 ий тўвыра аланыште тыршен, Кукмарий  культур пӧртыштӧ пашам ыштен.

«Шкешотан мыскара  историйже-влак кумылым нӧлтеныт, веселаҥденыт, шонкалаш таратеныт. Пўсӧ мыскараже пўшкылын, — шарналта  Сергей Карпов. – Палыме лиймыланна латик ият эртыш. Тудо, вияш эфирыш йыҥгыртен,  шке мыскаражым темлен ыле. Тўрлӧ ужмо-колмо историйже-влакым каласкалыш. Варажым шке возымо да газетлаште печатлалт лекше историй-влакшымат лудо. Кылна пеҥгыдырак да пеҥгыдырак лие.  Тиде жапыште кок книгажым лукташ полшышым. Икымшыштыже «Марий Эл», «Кугарня» да Советский районысо «Район илыш»  газетлаште  савыкталтше ойлымашыже ыльыч. Ик ойлымашыже  книгалан вуймутым пуаш полшыш: «Кузе вате марийжым туныктен». Возымыжо эркын-эркын шукеме да кокымшо книгаланат погынен шуо. Тудо «Кузе Кожай ўдырым налын» лўм дене лекте. Пытартыш ийлаште «Ончыко» журналын кажне номерыштыже гаяк мыскара ойлымашыже-влак савыкталтыч. А радиошто каласкалымыже шукыжо печатлалтын огыл. Шонымашыже ятыр ыле. Теве ик кугу шонымашыжым ынде тудын деч посна шуктем».

«Тыгай паша – томаша» мыскара ойпого жаплан, илышын кочыжым монден, шыргыжалаш тарата да весела кумылнам  арален кодаш полша. Вет автор тыште мемнан чылт марий койышнам, шонымашнам, шижмашнам  мастарын почын пуа.

Е.Садовин.

 

Если вы нашли ошибку, пожалуйста, выделите фрагмент текста и нажмите <em>Ctrl+Enter</em>.
Опубликовать в Мой Мир
Опубликовать в Одноклассники