УВЕР ЙОГЫН ЯЛ ИЛЫШ

Ынде пырчымат ончен кушта

Курыкмарий район гыч фермер-экспериментатор Андрей Бабушкин нерген газетна ятыр гана серен гынат, угыч возаш могай-гынат амал лектынак шога.  Але марте тудо пареҥге ден пакчасаскам ончен куштен гын, тений тергыме шот дене икымше гана пырчан культурым ӱден да шурным поген налын. 

Кызыт фермерын 800 гектар мландыже уло, тышеч пелыжым пытартыш ийыште налын. Чумыр 120 гектар пареҥге пасу гыч шӱдыштыжӧ кочшаш вожсаскам ончен куштен, молыштыжо урлыкашлан поген налын. Тений тыгак 26 гектарыште шоганым, 16 гектарыште ковыштам, 70 гектарыште пырчан культурым ончен куштен.

— Пырчан культурым таклан огыл, а пасушто кушкылым вашталтылме шот дене ӱденна. Ме пакчасаскам ончен куштымаште интенсивный технологийым кучылтына, сандене мландеш, эре ик культурымак вераҥден, тудым локтылаш огыл манын, пырчан культурым ӱдыде кертын огынал, — умылтара фермер. – Тергыме семын тудым изирак кумдыкеш гына ончен куштенна да лектыш кугу лийын гын, шушаш ийыште тенийсе деч шым пачаш шукырак, 500 гектареш,  вераҥдаш шонена..

Тений фермер пырче дене шуко оксам ыштен ок нал але йӧршеш ок нал манашат лиеш. Пырчан культуржымат шкаланжат вучыдымын ончен кушташ тӱҥалын, вет шурным коштышо агрегатшат, тудым аралаш пышташ вержат озанлыкыштыже уке улыт. Сандене чыла пырчым пасу гыч вигак «Горномарийский» сурткайык фабрикыш колтен. Тидым поро кумыл дене ыштен манашат лиеш, вет фабрике пыкше шӱла, сандене оксажымат ала налеш, ала уке — ок пале. Туге гынат предприятий кечыште 25 тонн пырчым кучылтеш, сандене ончыкылыклан фермер ты озанлык дене кылым ышташ ӱшаным ок йомдаре.

— Тӱҥжӧ – кушкылым вашталтылме шот дене севооборотым уэмдаш йӧн ешаралтеш, — манеш нигунам да нимолан вуйым сакыдыме фермер. – Шушаш ийлан пырчым коштымо оборудованийым налаш да шурным аралыме верым чоҥаш шонен пыштенна. Тыге пырчым пасу гыч вигак яра манме гаяк ужатыме деч утлена, аралаш пыштен, утларак кугу акым вучен, ужалаш йӧнна лектеш. Эшеже Марий Элын у правительствыже вольыкым палынак ешараш да шӧрым ыштен налме пашам кумдаҥдаш палемден, тугеже ончыкыжо фуражлык пырче садак кӱлеш лиеш шонена.

А.АНДРЕЕВ.
Снимкылаште: фермер А.Бабушкин; икымше шурно лектыш сай лийын.
К.Тереховын фотожо.

Если вы нашли ошибку, пожалуйста, выделите фрагмент текста и нажмите <em>Ctrl+Enter</em>.
Опубликовать в Мой Мир
Опубликовать в Одноклассники

Добавить комментарий

Ваш e-mail не будет опубликован. Обязательные поля помечены *