АРСЛАН ЕШ ИЛЫШ

Николай Чузаев: Шӱдӧ пачаш поро дене пӧртылеш…»

Еш, вате-марий кокласе кыл сайрак, пеҥгыдырак лийже манын, мом ыштыман? Вате- марийлан шкаланышт могай лийман? Шочшо-влак илышыште ынышт йом, шке верыштым муышт манын, нуным кузе ончен-куштыман? Мутат уке, нине йодышлан туныктышо, психолог-влак вашмутым пуэн кертыт. Но таче ты шотышто Морко район Арынысе Христосын шочымыжлан черкын протоиерейже , марий пӧръеҥ, Николай (Чузаев) ача дене мутланена. Вет тыглай айдемын илыш умылымашыже юмылан ӱшанышын деч ятырылан ойыртемалтеш. Лудшына-влаклан тудын ойжо пайдале лиеш манын ӱшанена. 

Николай Чузаев — 53 ияш. Ынде 20 ий утла Арын черкын настоятельжылан ышта. Черке пашаш 33 ияш толын, ончыч дьякон, вара священник лийын. Йошкар-Оласе педагогический институтым, Нижегородский духовный семинарийым тунем лектын. Кызыт эше Йошкар-Оласе да Марий епархий пелен православный литературым марлаш кусарыше комиссийын пашажым виктара. 2010 ийыште тудым патриарх парняш чийышаш ырес дене палемден.

— Еш — тиде изи черке, маныт. Тыгак лийже манын, мом ыштыман?

Черкын шкенжын иерархийже уло. Ешыштат тыгак лийшаш: тудын вуйжо — Юмо, ача — кугурак, ава — полышкалыше, йоча-влак – изирак полышкалыше. Ешыште чыланат икте-весылан илышым ворандараш полшышаш улыт. Еш — тиде ик организм. Вашлиялтше нелылыкымат пырля сеҥен лекташ куштылгырак. Ешын кӧрго вий-куатше лач пырляште пеҥгыдемеш.

— Но ешыште иктыжат — ни ачаже, ни аваже — юмылан ӱшаныше огытыл гын, тунам кузе?

— Кеч-могай айдемын ушышкыжо Пӱрышо сай-сай огыл умылымаш-влакым пыштен. Сандене нравственный нормо-влакым палена гын, кажныже шке илышыжым тудын дене келшышын ворандараш тырша. А кӧн тидыже уке гын, тыгай айдемылан полшаш кӱлеш. Кажне айдемын кӧрго вий-куатше, ончыкылык сай илышлан ӱшанже лийшаш.

— Южо еҥын илыжыше ӧрдыж гыч ӱй ден мӱй чучеш. Юмат тудлан нимогай нелылыкым ок колто, пуйто. Тудо Юмын ойырен налме еҥже мо?

— Тиде тыге чучеш веле. Вес айдемын чоныштыжо, ушыштыжо мо улмым ужын огына керт. Ме тудын тӱжвал илышыжым гына ужына, можыч, тудлан лу пачаш нелырак. Илышыште чыла сай улмо эше нимо нерген ой ойло. Жапын ик кутышыштыжо чыла сай лийын кертеш, но мучашыже могай лиеш, тудымат шоналтыман. Сандене илышыште кажныже юмын лу кӱштымашыжым шуктен илышаш. Тыге ме тӱнямбал гармонийын йодмыжым шуктена, тунам илышнат ворана, мучашнат сай лиеш. «Айдеме сайракым, кол келгыракым кычалеш», — маныт. Тыге лийшаш огыл. Колымо деч варасе кавасе илышым ме шкенан эртыме корнына дене тыште сулен налшаш улына. Но окса дене огыл, а ӱмыр мучко шке валне наҥгайыме ыресна дене. Иисус Христос семын. Айдемын шке лишыл еҥже-влак шотышто долгшо, ала-могай обязанностьшо улыт. Кушто гын чытышат, йӧратымашат кӱлыт.

Кумданрак — «Марий Эл» газетын
16 сентябрьыште лекше номерыштыже лудын кертыда.

Светлана Носова мутланен
Авторын фотожо

Если вы нашли ошибку, пожалуйста, выделите фрагмент текста и нажмите <em>Ctrl+Enter</em>.
Опубликовать в Мой Мир
Опубликовать в Одноклассники

Добавить комментарий

Ваш e-mail не будет опубликован. Обязательные поля помечены *