ТЕАТР УВЕР ЙОГЫН

Моско театрыште – Оршанке артист-влак

11 гыч 17 сентябрь марте Москосо руш драме театрыште «Русская драма» фестиваль эртен. 

Тудо Самуил Маршакын шочмыжлан 130 ий теммылан пӧлеклалтын. XIX фестивальын ойырен налме турышкыжо 226 театр коллектив гыч кум тӱжем утла самырык артист ушнен. Жюрин ойырен налмыж деч вара Москва, Воронеж, Краснокамск (Пермь кундем), Екатеринбург, Волоколамск, Клин, Тверь, Саратов да Российын моло олаж гыч театр-студий-влак мастарлыкым ончыктеныт. Марий Эл Республикнан чапшым нӧлташ Оршанке посёлко гыч «У Мурочки» образцовый театр-студий  миен. Тудо фестивальын кумшо кечынже «Наташина мечта» лӱман моноспектакльым ончыктен.    

– Мемнам шокшын вашлийыныт. Спектакль деч вара шинчавӱдым ӱштын лекше-влакат улыт ыле. Южышт тауштенат кайышт, – палемдыш театр-студийым вуйлатыше Алевтина Падерова. – Йоча-влаклан фестивальыш миен толмо кужу жаплан шарнаш кодеш, шонем. Тӱрлӧ коллектив дене вашлияш, икте-весын пашажым ончаш — моткоч кугу куан. Вет лач тыге пашам ворандарен колташ да улан тунемаш лиеш.

«Наташина мечта» спектакльыште Наташа Банинан рольжым сайын чоҥымыжлан артист Мария Ефремова посна диплом дене палемдалтын.

А.Байкова.
(Фотом театр-студийын альбомжо гыч налме.)

Опубликовать в Одноклассники

Добавить комментарий