«МАРИЙ ЭЛ» ТАЧЕ

«Марий Эл»: 2017 ий 22 сентябрь

! Марий Элын Социальный вияҥмаш министерствыжын данныйже почеш, республикыште инвалидностян 72 тӱжем утла еҥ ила. Нунын кокла гыч ик кумшо ужашыже коштын огеш керт але тидым ышташ неле, сандене нунылан ешартыш йӧным ыштыман. Общероссийский калык фронтын Марий Элысе отделенийжын Йошкар-Олаште тазалык шот дене начар улшо еҥ-влаклан инфраструктур объектлаш логалаш йӧн улмым тергыме почеш «йыргешке ӱстел» йыр мутланымашым эртарымыж негызеш «Инвалидлан тӱрлӧ чарак молан лектеш? статья сералтын. Тушто начарын ужшо да коляске дене коштшо инвалид-влакын тыглай илышыште могай нелылык дене тӱкнымышт нерген ойлалтеш.

!«Марий Эл» газетеш журналист Г.Зайниевын «Марий йылмызе марла возен мошта мо?» статьяже «Йылме шумлык» рубрике дене кум номерыште савыкталте. Статьян авторжын шонымыж почеш «кутырымашке ушнаш еҥ-влакым тараташ манын, лӱмынак пӱсынрак» серыме. «Россий кӱкшытан I Марий погынлан ик курым теме. Тудым молгунамсе семынак Пӱрӧ олаште палемдышт. Тиде кугу датылан тӱшка вий дене ямдылыме книга лекте. Тушко марий историй дене кылдалтше пеш шергакан материал-влакым пуртымо. Г.Зайниев нунын нерген шке шонымыжым статья гоч почо. Мутат уке, палемдыме южо тӧрсыржӧ дене келшаш кӱлеш. Но, мемнан шонымаште, тидымак вес семын возаш лиеш ыле. Тыге кычалтыл, койдарен серкалаш тӱҥалына гын, ончыкыжак огына кай. Пашам пырля умылен ыштыман»,-манеш филологий науко кандидат, Марий шымлыше институтысо йылме пӧлкам вуйлатыше О.Сергеев Г.Зайниевын статьяжлан вашешмут семын возымо «Порым шонен возымо огыл» статьяштыже.

! «Уста марий музыкант Виталий Шапкин нерген пеш шуко возымо. Тудо шкежат кум книгам савыктен луктын. Мый Шапкинмыт еш дене икымше гана Чувашийысе Мариинский Посадыш миенам ыле. Шукертак ӱжыныт ыле мӧҥгышкышт. Да теве маэстрон 70 ияш лӱмгечыж вашеш, август тӱҥалтыште, тушко тарванышым. Да материалым ты вашлиймаш гыч репортаж семын, утыжым тӧрлыде, могай мутланымаш лийын, туге ямдылышым», — манеш журналист Светлана Белкова «Семмастар деке – унала» вуймутан статьяштыже.

! «Кӧтремъ». Тыгай лӱман выставке кодшо арня мучаште Калык арвер сымыктыш тоштер-пöртыштӧ почылто. Оҥай лӱман выставкын авторжо — Марий Турек район гыч сӱретче-апшат Николай Тимофеев. «Николай Григорьевич кӱртньым таптен, кумло ий утла тӱрлӧ арверым ямдыла, ты пашалан самырык тукымымат кумылаҥда. Кӱртньӧ мастарын пашаже-влак ойыртемалтше, шкешотан улмышт дене шинчаш пернат. Ончалмеке, иканаште умылаш неле. Тидын нерген выставкым почмашке погынышо йолташыже, землякше, коллегыже да искусствым йӧратыше-влакат ойлышт», — . воза «Чия денат, кӱртньым таптенат сӱретла» статьяштыже автор Алевтина Байкова. Материал Михаил Скобелевын ятыр сылне фотожо дене сӧрастаралтын.

А.АНДРЕЕВ ямдылен.

Если вы нашли ошибку, пожалуйста, выделите фрагмент текста и нажмите <em>Ctrl+Enter</em>.
Опубликовать в Мой Мир
Опубликовать в Одноклассники

Добавить комментарий

Ваш e-mail не будет опубликован. Обязательные поля помечены *