МЕР ИЛЫШ УВЕР ЙОГЫН

У вуйлатыше дене пырля ончыко у ӱшан дене ончена

21 сентябрь республикын илышыштыже ик эн тӱҥ кече лийын –Йошкар-Олаште, Конгресс-влакын полатыштышт, Александр Евстифеевын Марий Эл вуйлатышын должностьышкыжо шогалмылан пӧлеклалтше мероприятий эртен. 

Инаугурацийыш Россий Президентын полномочный представительже Михаил Бабич, Россий Президентын администрацийже гыч представитель-влак, пошкудо регион вуйлатыше, республик правительстве член, Кугыжаныш Погын депутат, муниципал образований, район, ола администраций вуйлатыше-влак да ятыр моло чумыргеныт ыле. 

Почетный караулын парадный расчетшын залыш Российын да Марий Элын кугыжаныш тистыштым, тыгак Россий Федерацийын да Марий Эл Республикын Конституцийыштын посна экземплярыштым, Штандартым да Марий Эл вуйлатышын посна знакшым кондымеке, Александр Евстифеев пурыш. Марий Эл ЦИК председатель И.Татаринова сайлымашын иктешлымашыж дене палдарыш, тудлан Марий Эл Республик вуйлатышын удостоверенийжым кучыктыш да саламлыш. Тылеч вара А.Евстифеев, Конституций-влакын церемонийлык экземплярлашкышт кидшым пыштен, присягым ончыч марла, вара рушла ойлыш. Лудын пытарымекше, вуйлатышын посна знакшым шӱйышкыжӧ сакышт да Марий Эл вуйлатышын должностьышкыжо официально шогалме нерген увертарышт. Александр Евстифеев Марий Эл Республик вуйлатышын должностьышкыжо шогалме нерген распоряженийыш кидпалыжым пыштыш. Тылеч вара Я.Эшпай лӱмеш Марий кугыжаныш филармонийын хоржо Российын, Марий Элын гимныштым рушла, марла да курыкмарла йоҥгалтарыш.

Должностьыш шогалмыж дене А.Евстифеевым эн ончычак Михаил Бабич саламлыш. Тудо тыге мане:

– Республикыште илыше калык тыланда ӱшана. Тидым 88 процент утла йӱкым пуымо пеҥгыдемда. Калыкын ӱшанжым сулаш кӱлеш. Ончылно кугу паша вуча. Но але марте ыштыме пашада ончыкта: чылажат шукталтеш да шонымо семын лектеш.

Умбакыже у вуйлатышым РФ Федеральный Собранийын Федераций-влак Советшын тӱнямбал паша-влак шотышто комитетшын председательже Контантин Косачев Федераций-влак Совет председатель Валентина Матвиенкон, Кугыжаныш Думын депутатше Светлана Солнцева РФ Кугыжаныш Думын председательжын алмаштышыже, «Единый Россий» фракцийын вуйлатышыже Владимир Васильевын саламлымашыштым лудыч. Йошкар-Ола да Марий архиепископ Иоанн Москва да Уло Русьын патриархше Кириллын саламлымашыжым лудо, Архипастырский благословенийым кучыктыш. А кунам шке лӱмжӧ дене саламлен ойлыш, погынышо-влак кокла гыч южыштын веле огыл, Александр Евстифеевынат кумылжо тодылто. Ойлымыжым колышт пытарымеке, нершовычшым луктын, шинчажым да чурийжым ӱштыльӧ.

– Пагалыме Александр Александрович. Таче Юмо тыланда кугу чапым пуэн да ӱшаным ыштен – Тыланда республикнан калыкше кучыкталтеш. Тыланда кажныжым шӱмышкыда пуртыман. Преподобный Паисий святогорец ты шотышто тыгай шонымашым каласен: кажне еҥым шӱмыш пуртымо годым мудреч лийман. А мудреч койыш теве кузе палдырнышаш: висан ик велныже пеҥгыдылык да тоштмаш, весыштыже йӧратымаш да чаманымаш лийшаш. Тыгодым ик велжат нӧлталтшаш але волен кайышаш огыл. Таче — Юмынаван шочмо кечыже. Тыгак Куликов пасушто сеҥыме кече. Тиде Юмынаван Тендам духовно аралымыжым ончыкта. Таче мый     Тендам Юмынаван образше дене благословитлынем. Тек тудо илышдан чыла корныштыжат арала. Тудлан эҥертыза да полшаш йодса. Тудо ава семын уда деч авырен налеш да куштылго огыл пашадам шукташ полша. Саламлем Тендам! – мане архиепископ  Иоанн.

Тылеч вара Юмынаван юмоҥажым кучыктыш. Александр Александрович кум гана ыреслыш,  вара, тауштен, пӧлекым кидышкыже нале.

Умбакыже Марий Эл Кугыжаныш Погын председатель Юрий Минаков Дмитрий Медведев, Россий министр, регион вуйлатыше, шуко моло деч саламлымаш ден телеграмме-влак пурымо дене палдарыш.

Инаугураций деч вара вигак Михаил Бабич ден Александр Евстифеев журналист-влакын йодышыштлан вашештышт. «У вуйлатыше семын могай икымше ошкылда лиеш?» йодмылан А.Евстифеев тыге вашештыш:

– Мыйын тиде икымше ошкыл огыл, а умбакыже шуйнышо лиеш. Лишыл кечыла нерген ойлаш гын, пасу тургымым мучашлыман,  олтымо пагытлан ямде лийман, 2018 ийлан бюджет проект дене пашам ыштыман. Республикын парымже, йочасадлаште вер ситыдыме, моло нергенат шарнена. Але марте кузе ойленам, кызытат тидымак каласем: чылаштым пашам пырля ышташ ӱжам.

Любовь Камалетдинова.
Д.Речкинын фотожо.

Опубликовать в Мой Мир
Опубликовать в Одноклассники

Добавить комментарий