МАРИЙ ЙӰЛА УВЕР ЙОГЫН

Марий онаеҥ-влак шыже кумалтышлан ямдылалтыт

Кодшо шочмын нуно Марий Турек посёлкышто  Марий юмыйӱла ушемын верысе «Ошмарий- Чимарий» пӧлкажын пӧртыштыжӧ погыненыт. Марий онаеҥ-влак дене вашлияш районысо  администраций вуйлатыше С.Решетов ден тудын алмаштышыже Л.Ложкина миеныт. Каласен кодыман, ты районышто администраций ден юмыйӱла ушем коклаште кыл пеҥгыде. Таклан огыл марий кумалтышлан вуйын шогышо ушемлан эсогыл посна оралте ойыралтын. Онаеҥ-влак тудым шке вий дене уэмден олмыктен шынденыт. Ынде чыла йодышым пырля погынен каҥашашышт, уна-влакым вашлияшышт, кумалтыш арверым аралашышт шкеныштын верышт уло.

Верысе юмыйӱла ушем вуйлатыше Григорий Ивановын тыршымыж дене пӧртын ик ужашыштыже марий калык йӱла дене кылдалтше тоштер ышталтеш. Кызыт тудым эше официально почын огытыл гынат, чумырымо ятыр экспонатшым мушкын, эрыктен, ончаш луктын шындыме. Нуно калыкнан эртыше илышыжын тӱрлӧ шӧрынжо дене палыме лияш полшат. Мутат уке, ты тоштерыш ончаш толшо-влак ситышын лийыт, школышто тунемше-влакланат оҥай лийшаш.  

Марий онаеҥ-влак шке погынымаштышт шыже кумалтыш радамым пеҥгыдемденыт, организацийын пашажым ворандарыме дене кылдалтше тӱрлӧ моло йодышым каҥашеныт.

С.Носова.
Снимкылаште: онаеҥ-влакын погынымашышт годым.
В.Зайцевын фотожо.

Опубликовать в Мой Мир
Опубликовать в Одноклассники

Добавить комментарий