МАРИЙ ЙӰЛА

Сӱрем ото, Шем ото… Тидыжат, тудыжат Юмын сурт

Волжский район Корамас кундемысе Нурмучаш ял воктен чимарий шӱгарлам  ончен  савырнымеке, верысе онаеҥ А.Федоров тоштыеҥ-шамычын курымашлык омо дене малыме верыштым, пасуш лектын, тора гыч ончалаш темлыш. Тореш шым лий, молан манаш гын ты шӱгарлам тыгак тора гыч, но вес вел гыч, Нурмучаш ял мучаш гыч, тӱсленак эскерышым. Курык кӱкшакаште шинчымыла койо. Тушко йолын, вуй деч кӱшкӧ кушшо оргаж гай пеҥгыде вурдан шудым таен, келге корем гоч вончышна. Вара курыкыш кыртмен кӱзышна. Тыге шонымо верыш логална. Чынжымак курыкышто, но тале мардеж логалдыме тайылыште, верланен. 

Пасу велым шӱгарлам эскерыме  годым нимогай ойыртемалтше палым шым уж: лышташан пушеҥган чодырала, эшеже кугу отыла веле коеш. Лач тыгодым вуйышто йодыш шочо:  

– Ожно шӱгарлалан верым кузе ойырен налыныт? –Аркадий Алексеевич деч йодым. Тиде йодышлан вашештымыжым шукерте огыл газетыштына савыкталтше «Шӱгарла волгалт шинчышаш огыл мо?» статьяштем ончыктенам ыле. Ужашыжым ушештарем.

– Тидын нергенат тӱрлым ойлат. Южышт омеш кончымо почеш ойырен налме, пуйто курык сер воктене чоҥгаташте шнуй вер кончен, маныт. Пушеҥгым ончен ойырен налыныт манаш амал уло. Лышташан пушеҥган, кожлан шӱгарлам посна йӱла почеш ойырен налыныт векат, – шонымашыж дене палдара А.Федоров. – Лышташан пушеҥгын укшыжо кумалме отышто кӱшкыла, Юмо декыла кушкеш, ме чыла сайым кӱшыч вучена. А иман  кожын укшыжо ӱлыкыла кечен кушкеш, тыгай верыште мланде йымалне кийыше тоштымарий деч йӧным ышташ йодыт. Шӱгарламат тыгай пале денак ойыреныт векат. Тидыже Юмо декат, мланде йымал тӱня декат кайыме корным ончыктен шонем.

Ынде тиде ужашым молан ушештарымем рашемдем. Умбакыже онаеҥ А.Федоров ты шӱгарла деч тораштак огыл, но тӱрлӧ могырым верланыше Сӱрем ото ден Шем отым кузе ойырен налме нерген каласкалыш. Кок отыжат пасу гоч раш койыт.

Кумданрак — «Марий Эл» газетын
19 сентябрьыште лекше номерыштыже лудын кертыда.

 

Анатолий АНДРЕЕВ.
Авторын фотожо.

Опубликовать в Одноклассники

Добавить комментарий