УВЕР ЙОГЫН ЯЛ ИЛЫШ

Куатше ятырлан ешаралтеш

Медведево районысо Ятман ялыште у сӧсна комплекс почылтын. Тушто талук еда 45 тӱжем вуй сӧснам ашнаш да Йошкар-Ола шыл комбинатыш 5 тӱжем утла тонн шылым колташ тӱҥалыт.

«Шойбулакский» племзаводын комплексшым идалык жапыште чоҥен шуктымо. Тудым почмаште республикым вуйлатышын пашажым жаплан шуктышо А.Евстифеев лийын. Инвестиций проектын акше – 900 миллион чоло теҥге. Тышечын 200 миллионжо – кӱсынлымӧ средства. «Йола» агрохолодингын вуйлатышыже-влак ӱшанат: чын шотлен лукмо бизнес-план кредитым лишыл жапыштак пӧртылташ йӧным пуа.

А.Евстифеевлан агрохолдингын чумыр пашажым ончыктеныт. Предприятий пасу-прилавке йӧн дене пашам ышта. Тыге сатун качествыж шотышто кокытеланышаш уке. Комплексыште датский технологий кучылталтеш. Рашемдыман: тылеч ончыч чоҥымо кум комплексыштыжат тыгаяк йӧнлан эҥертат. Чумыр пашам автоматизироватлыме. Ик ава сӧсналан шотлымаште талукышто 17 игым налыт. Чыла пашаеҥ кӱшыл шинчымашан, тылзаш кокла пашадарышт 60 тӱжем теҥгешке шуэш. Озанлыкын пасужо ий еда кумдаҥын толеш. Тений 26 тӱжем гектарым эртен. Тидлан кӧра чумыр кургым шкаланже шкеак ямдыла.

«ЙОЛА» агрохолдинг – республикыштына шылым перерабатыватлыше ик эн кугу предприятий. Тудо шыл консервым, полуфабрикатым, колбаса сатум  ямдыла. Агрохолдингыш «Йошкар-Ола шыл комбинат» ден «Шойбулакский» племзавод» ЗАО-влак пурат. Племзаводын комплекслаштыже талукышто 140 тӱжем вуй сӧснам ашнат, комбинатыш 15 тӱжем тонн шылым колтат.

Сатушт мӱндырнат палыме

Марий Эл Республикым вуйлатышын пашажым жаплан шуктышо А.Евстифеев «Марийский» ден «Йошкар-Ола» шыл комбинат» ационер ушемлашке миен коштын.

«Марийский» ЗАО республикыштына бройлер чывиге шылым да тудым перерабатыватлыме кочкышым, тыгак шӧрым да шӧр сатум ямдылыше куатле озанлыклан шотлалтеш. А.Евстифеевым предприятийыште кучылтмо ончыл технологий дене паладреныт.      

Предприятийын тӱҥ куатше-влак Краснооктябрьский посёлкышто верланеныт. Тыште бройлер чывигым ашныме да шагатыште 3000 вуй сурткайыкым шӱшкылмӧ, переработатлыме, тыгак суткаште 30 тонн шӧр

кочкышым ямдылыше цех-влак улыт. Предприятий швейцарский технологий почеш ямдылыме «Тильзитер» ден «Гауда-Премиум» сырже-влак дене кугешна. Тудын «Птица» ужалыме марке дене палемдыме 50 утла кевытше уло. Сатужын акше да качествыже келшышылан кӧра тудым шкенан республикыште  илыше-влак веле огыл, Москваште, Озаҥыште, Сыктывкарыште, Кировышто да Российысе моло олаште кумылын налыт. Предприятий таче чыве шыл гыч  60 утла тӱрлӧ колбасам да коптитлыме кочкышым, консервым, 40 утла тӱрлӧ полуфабрикатым луктеш. Вич ий ончыч сурткайык шылым переработатлыме у цехым пашашке колтымылан кӧра полуфабрикатым кок пачаш шукырак лукташ тӱҥалыныт да ынде сменыште 7 тонн утлам ямдылат.

А.Евстифеев «Йошкар-Ола шыл комбинат» акционер ушемыште лиймыж годымат сай лектыш дене пашам ыштыме примерым ужын. Комбинатын сатужым пӱтынь элыштына палат. А «Йошкар-Олинская тушенка» бренд Российысе 60 утла регионышто чапым налын. Предприятийын 320 утла кевытше уло.

Комбинатын сатужым республик, Россий, тӱнямбал кӱкшытан выставкылаште диплом, медаль дене ятыр гана палемдыме. Тылеч посна ятыр конкурслаште кӱкшӧ акым налын. Предприятийыште шкенан да йот эллаште ямдылыме оборудованийым кучылтыт, сатум ямдылыме годым чумыр правилым тӱрыс шуктат. Комбинат сырьем агрохолдингын озанлыкыштыже ямдылымым гына налеш.

В.Смоленцев.

Опубликовать в Одноклассники

Добавить комментарий