УВЕР ЙОГЫН

Кок пачаш куанле кече!

1 сентябрь Волжский районысо Купсола школышто тунемше, нунын ача-авашт да туныктышо-влаклан ик эн куанле лийын – ты кечын тыште у школым почыныт. Тидын дене Марий вуйлатышын пашажым шуктышо Александр Евстифеев саламлен.

– Ончычсо школ кужу жап пашам ыштен, ятыр шотан еҥым илыш корныш луктын. Таче ме у школым почына. Тудо тендан йӧратыме лиеш манын ӱшанем,- палемден А.Евстифеев.

Погынышо-влакым школым почмо дене Россий Образований да науко министерствын департаментшын директоржын алмаштышыже Дмитрий Иванов саламлен да Россий образований министр Ольга Васильеван саламлымашыжым лудын.

Торжественный линейкын официальный ужашыжым мучашлымеке, уна-влак у школым ончен савыреныт.

– Тунемше, нунын ача-авашт, туныктышо-влакын таче моткочак куанле кече. У школым почмым ме кужун вученна. Ончычсо школлан  60 утла ий, но ме тыршенна да пашам ыштенна, – ойлен школ директор Анатолий Воронцов.

Пайрем кечын, мутат уке, икмыняр шагат шуйнышо занятий-влак лийын огытыл. Туге гынат тунемше-влак шке классышкышт пуреныт. Ты кечын эртаралтше улыжат ик урок «Россий – шочмо кундемем» темылан пӧлеклалтын. 

Л.Камалетдинова.

 

Опубликовать в Одноклассники

Добавить комментарий