СОЦИАЛЬНЫЙ ИЛЫШ

Оксам шалатылаш пуэн огытыл

Илыме вер ден коммунальный озанлык организаций-влак  услугыштлан тӱрлӧ амал дене тарифым чарныде кугемдат, тыгодымак пашаштын саеммыже ок кой.  Ты окса вара кушко кая? Лач тидым терген налыныт Медведево, Шернур районласе прокуратур, Курыкмарий ден Волжскысо межрайонный прокуратур орган-влак.

Кажне тергымаш годым криминал дене кылдалтше нарушенийым: еҥ-шамычым илаш йӧрдымылан шотлымо пӧртла гыч весыш кусарымылан, ресурсым колтен шогышо организаций-влаклан тӱлаш колтымо оксам  шалатылмым, моло нарушенийым — тӱжвак лукмо.

Теве Волжскысо межрайонный прокуратурын тергыме материалже почеш ТСЖ член-влакын оксаштым шке кӱсенышкыже пыштыше товариществе председатель шотышто оксам шкалан налме але растрате статья дене уголовный делам почмо ыле. Район суд кодшо кечылаште вуйлатыше шотышто титаклыман приговорым луктын.

Медведево районын прокуратуржо Кундыш ял илем администрацийын ончычсо вуйлатышыжын илыме вер законодательствым кок гана пудыртымыжым яндар вӱдыш луктын. Тудын кӱштымыж почеш аварийнылан шотлымо пӧртыш сай илыме верлаште илыше палымыже-влакым пуртеныт. Вара нуныштым, илыме вер шотышто чӱдын илышылан шотлен, у пачерлаш кусареныт. Ты вуйлатыше шотышто должностной полномочийым кугемдымылан статья дене кок уголовный делам тарватыме, нуно кызыт шымлалтыт. Тыгак аварийныйлан шотлымо оралтыла гыч еҥ-влакым кусарышашлан шуко пачеран пӧртым нӧлтымаште да пашаш колтымаште оксам шолышташ тӧчымым жапыштыже кораҥдыме.

Козьмодемьянск олан администрацийже муниципальный контракт почеш илыме верым чоҥымо паша кузе кайымым эскерышаш ыле, но тудо ты сомылым ӱмбакше налаш кӱлешлан шотлен огыл. Тидлан кӧра илаш йӧрдымӧ пачерлам приниматлен, тыге еҥ-влакын илыме верлан Конституцийыште пеҥгыдемдыме праваштым, нуным аварийныйлан шотлымо пӧрт гыч уыш кусарыме радамым  пудыртен. Ты кугу экшыкым Курыкмарий межрайонный прокуратур терген, кызыт следствий кая.

Шернур район прокуратурын тергыме материалже гыч рашемын: аварийныйлан шотлымо пӧрт гыч еҥ-шамычым республикысе адресный программе дене келшышын у илыме верыш кусарымаште, должностной полномочийым кугемден,  шонен лукмо чаракым ыштылыныт. У пӧртыш куснышаш еҥ-влак деч пачерым налме годым  софинансирований шот дене 100 тӱжем теҥге гыч тӱлаш йодыныт. Тыге нуно пуйто пӧртым нӧлтымаште лийше роскотым пӧртылтышаш улыт улмаш. Но вет пӧртшӧ муниципальный собственностьыш налалтын, сандене  пачер ешлан социальный найм договор почеш пуалтшаш. Кызыт следствий эрта.

А.АНДРЕЕВ.

Если вы нашли ошибку, пожалуйста, выделите фрагмент текста и нажмите <em>Ctrl+Enter</em>.
Опубликовать в Мой Мир
Опубликовать в Одноклассники

Добавить комментарий

Ваш e-mail не будет опубликован. Обязательные поля помечены *