ПАТЫРЛЫК

«Ида йомдаре лишылда-влакым тыныс жапыште»

Кундемыштына военно-патриотический шўлыш палынак шижалтеш. Тидын шотышто тўрлӧ паша ышталтеш, мероприятий-влак эртаралтыт.

Шукерте огыл Российыште юж-десантын кечыжым палемдышт. Ты гана тудым Марий Элыштат организатор-влак моткоч кугу кўкшытыштӧ эртарышт. Амалжат лийын: Йошкар-Оласе Сеҥымаш бульварыште Российын Геройжо Марк Евтюхинлан бюстым почыныт.

Очыч молгунамсе семынак Воинский Чап мемориал воктене торжественный саламлымаш лие. Тушко Марий Эл вуйлатышын пашажым жаплан шуктышо Александр Евстифеев, Россий Президентын Юл кундем федерал округышто полномочный представительже Михаил Бабич, РФ Юж-десант войскан командующийжын алмаштышыже Владимир Кочетков толыныт, десантник-влакым шокшын саламленыт.  Моло уна-влак дене пырля Курымаш тул воктеке пеледыш аршашым пыштеныт.

Варажым бюстым почмо верыште Российын геройжо, ўмыр лугыч лийше десантник-влакым шарналтеныт.

Тиде мероприятийыште икмыняр район гыч кадет класслаште тунемше ўдыр-рвезе-влакым юнармеец радамыш пуртеныт.   

Землякна Марк Евтюхинлан бюстым почмо годым аважын, Лидия Ивановнан, мутшо шукыштын чонешышт логалын.  Шагал огыл ава тыныс жапыште шке эргыжым йомдарен. Тидымак шотыш налын, землякна, генерал-майор, юж-десант войскалан 12 ийым пӧлеклыше С.Воронцов шуко поро мутым каласен. «Шўдӧ дене рвезе-влак десантник-шамыч дене кугешнат. Чылалан йӧратымашым, тазалыкым, пиалым тыланем. Ида йомдаре тыныс жапыште шке йолташдам!», – шергылтын пеҥгыдын каласымыже.

Гвардий подполковник, батальон командир Марк Николаевич Евтюхин 1964 ий 1 майыште Йошкар-Олаште военный строитель ешыште шочын. Салтак илышыже Псковысо дивизийыште (ВДВ) эртен. 13 ий жапыште Марк Евтюхин шуко «шокшо» точкышто лийын. Командировкыжо Киргизийыште, Азербайджаныште, Арменийыште да Афганистаныште эртен. Югославийыштат лияшыже логалын.

Черетан командировко 2000 ий 29 февральыште лийын. 104-ше парашютно-десантный полкын 6-шо ротыжо 776 метр кўкшытыштӧ лийын. Лач ваштареш ты корно дене сепаратист-влакын кок тўжем еҥан тўшкашт толын (вуйлатышышт Басаев ден Хаттаб).

1 март эрдене кокымшо Чечня сарысе шукылан палыме ойган  вашпижмаш лийын. Кўшнӧ, курыкышто оружийым кучаш йӧршӧ ныл гвардеец гына кодын. Эн лўдыкшӧ жапыште подполковник Евтюхин ден капитан Романов артиллерийын тулжым «ўмбакышт» колташ йодыныт. Икмыняр жап гыч лўддымӧ да патыр комбатын илышыже кўрылтын.

Тыге, шке илышым чаманыде, десантник-влак Хаттаб ден Басаевын планыштым кўрлыныт.

Комбатын патырлыкшым да героизмжым шотыш налын, террорист-влак ваштареш кучедалмаште геройлыкым ончыктымыжлан Йошкар-Ола гыч  десантник Российын Геройжо лўм дене палемденыт.

Геройым шарныме лўмеш Йошкар-Олаште кажне ийын дзюдо дене всероссийский турнир эртаралтеш. Североморскышто (Мурманск область) 7-ше №-ан школ зданиеш (Марк тиде школым тунем пытарен) мемориал оҥам сакеныт), Псковышто 5-ше №-ан школлан тудын лўмжым пуэныт. Тыгак Йошкар-Олаште Геройын шочмо да илыме пӧртыштыжӧ (Гагарин проспект, 18-ше №-ан пӧрт) мемориал оҥам почыныт.

Марк Евтюхиным Псковысо иза-шольо шўгарлаш тойымо.

Е.Эшкинина.

 Фотом келыштараш: Скобелев/ август 2017/ ВДВ…   

Опубликовать в Мой Мир
Опубликовать в Одноклассники

Добавить комментарий