МЕР ИЛЫШ

Делегат-влакым сайленыт

Изарнян, 10 августышто, Йошкар-Олаште Россий Федерацийысе финн-угор калык-влак ассоциацийын (АФУН РФ) марий пӧлкажын погынымашыже лийын. Тудо Российысе финн-угор калык-влакын VI погынышт вашеш эртаралтын. Форум 27-30 сентябрьыште Коми Республикын рӱдолаштыже, Сыктывкарыште,  лиеш да «Российысе финн-угор калык-влак: гражданский ойыртем ден этнокультур поянлык» темылан пӧлеклалтеш. Погын жапыште «Йылме. Образований. Науко», «Культур. Этнотуризм», «Экологий. Нацийын тазалыкше», «СМИ. Информационный технологий», «Самырык тукым: гражданстве, патриотизм, йӱла» секций ден «Социальный партнёрство. Бизнес» «йыргешке ӱстел» пашам ышташ тӱҥалыт.

Погынымаште марий пӧлкан пашаж дене вуйлатыше В.Мочаев палдарен. АФУН-ын вице-президентше М.Васютин тачысе кечын Российысе финн-угор калык-влак коклаште марий-шамычын могай кӱкшытышт улмо нерген ойлен.

Варажым Марий Элысе пӧлкан у председательжым сайленыт. Кок кандидатур темлалтын: МАФУН-ын ончычсо президентше В.Петров ден «Марий Эл» газетын тӱҥ редакторжын алмаштышыже С.Пехметова. Шукырак йӱкым Светлана Федоровна поген.

Погыныш лу делегатым  (индеш марийым да ик удмуртым) сайлыман ыле. Нунын радамыш логалыныт: Л.Абукаева, Э.Александров, А.Гурьянов, Л.Иксанова, В.Овчинникова (удмурт), С.Пехметова, А.Титов, Е.Чашкин, А.Чемышев, Р.Чузаев. Тылеч посна ныл экспертым (В.Иванов, Е.Кузьмин, В.Петров, Н.Шабдаров) сайленыт. АФУН-ын советыштыже Марий Эл гыч улшо еҥ-влак М.Васютин, А.Иванов, В.Мочаев, Э.Куклина тыгак делегацийыште улыт.

Л.ШАБДАРОВА.

Если вы нашли ошибку, пожалуйста, выделите фрагмент текста и нажмите <em>Ctrl+Enter</em>.
Опубликовать в Мой Мир
Опубликовать в Одноклассники

Добавить комментарий

Ваш e-mail не будет опубликован. Обязательные поля помечены *