УВЕР ЙОГЫН

Уло мо дене ӧрдыж еҥым ӧрыктараш!

Йошкар-Ола «Великий Волжский путь» турист маршрутысо Российысе ола-влак радамыш пурталтын.

Татарстан Республикын Туризм шотышто кугыжаныш комитетшын увертарымыже почеш, Казань-Йошкар-Ола-Чебоксар да Киров-Йошкар-Ола- Казань маршрут-влак ышталтыныт. Тений шыжым нине машрутым школышто тунемше-влаклан темлаш тӱҥалыт. Кызыт оператор-влак нунылан могай кочкышым темлыме, кушко илаш вераҥдыме, могай экскурсионный программым ямдылыме нерген шонат. Кажне маршрутшо кум йӱд да кок кече шуйнаш тӱҥалеш.

  Российысе 13 республик ден областьым авалтыше ты маршрут кодшо ийысе декабрьыште ышталтын. Тунам Санкт-Петербургышто эртыше тӱнямбал культурный форумышто Юл кундемысе регион-влак ойпидышыш кидпалым пыштеныт. Юл кундемысе округышто ты маршрутыш Нижний Новгород, Киров, Казань, Йошкар-Ола, Саратов, Пермь, Ижевск, Самара, Пенза, Ульяновск, Саранск да Чебоксар пуреныт.

 Марий Элын Туризм шотышто комитетшын увертарымыже почеш, тачысе кечылан республикыште 170 наре турист маршрут ден экскурсионный программе пашам ыштат. Мутлан, «Чудеса Земли марийской» маршрут Йошкар-Ола ден Козьмодемьянскым авалта,  «Край звонких гуслей» — Йошкар-Олам, Козьмодемьянскым да Чебоксарым, «Ваштар курык мучко путешествий» «Марий чодра» национальный парк дене палдара, «Йошкар-Ола — Унчо» Морко районыш, «Индеш памаш» Медведево, Советский, У Торъял, Кужэҥер районласе памаш еда коштыка, «Шереметьевмыт замкын легендыже» Юрино, Килемар районлам шерын лекташ полша.  Икманаш, уло Марий Элыште ӧрдыж еҥым мо дене ӧрыктараш!

С.Носова.

Если вы нашли ошибку, пожалуйста, выделите фрагмент текста и нажмите <em>Ctrl+Enter</em>.
Опубликовать в Мой Мир
Опубликовать в Одноклассники

Добавить комментарий

Ваш e-mail не будет опубликован. Обязательные поля помечены *