КУЛЬТУР ДА ИСКУССТВО

«Илышем вес могырыш савыралнем»

Тачысе лаштыкнан унаже – Пермь кундем Суксун район Олыкъялын чолга ӱдыржӧ Елена АФАНАСЬЕВА.

— Елена, Марий самырык тукым слётыш толаш тыйым мо таратен?

Тышке толаш тукым изам Александр Николин кумылдаҥден. Тудо ӱмаште Оршанке район Кугу Ӧршаште эртыше слётышто лийын, теният пырля толын. Эн ончыч марла яндарын мутланыше ӱдыр-рвезе коклаште кутырымо йылмем лывыртынем. Тыгак у еҥ дене палыме лийме шуын.

— Шижалтеш, ик верыште шогаш от йӧрате…

Пермь кундемысе кугыжаныш управлений академийыште тунемам, тыгак кевытыште ужалышылан ыштем. Лишыл жапыште илышемым вес могырыш савыралаш шонем. Академийыште негызым налынам, проект-влакым возаш тунемынам, сандене Пермьысе ялозанлыкакадемийыш, архитектурно-строительный факультетыш, тунемаш пурынем. Мый тыгак Кунгурысо техникумышто мланде паша дене специалистлан тунем лектынам, но умбакыже виянаш шонен, кӱшыл образованийым налаш вашкенам.

— Моло мер пашашкат чолган ушнет?

Самырык годым шкем чыла вере терген ончыман, сандене йӧн лийме годым тӱрлӧ вере ушнаш тыршенам. «Самырык гвардий»  мер организацийын чолга еҥже лийынам. Школын ,ссузын,  вузын чыла мероприятийышкышт ушненам, усталыкем ончыктенам.  Ӱмаште самырык-влакын «iВолга» форумышкышт миенам, Култаево селаште паркым тӱзатыме дене кылдалтше проектым араленам. Форумышто шкаланем ятыр уым налынам, сайын каненам, йолташ-влакым муынам.   Нунын ден кызытат кылым кучем.

Марий Эл деч посна могай кундемыште лийынат?

Изи годым Свердловск кундем Кӱшыл Потамыш родо-тукымем деке миенам. Но тидыжым сайын ом шарне, авамын каласкалымыж гыч веле. Тылеч посна Самара, Новосибирск, Нижневартовск олалаште лийынам. Мылам у вершӧрым ончен кошташ келша.

Марий кундемыште икымше гана улам. Калыкнан кугезе мландыштыже лияш мылам кугу пиал.

— Ик жап шочмо йылмет дене мутланымым чарненат. Амалже могай?

Ача-авам марий улыт, ешыште марла гына мутланена. Шымше класс марте мый шкежат шочмо йылме дене гына кутыренам, марий йылмылан мемнам Кызганде школышто туныктышо Надежда Васильевна Спиридонова шӱмаҥден. Но кугурак класслаште марий йылме изиш ӧрдыжкырак шӱкалалтын. Очыни, тидыже самырык-влак коклаште рушла гына мутланыме дене кылдалтын. Тыгак мемнан велне марий телевидений, радио уке. Тидыжат шочмо йылмым мондымашке конда, векат.

А кызыт марий йылмем шкеж деке чотак шупшеш. Тудын дене кутырымо, калыкнан тӱвыраже, йӱлаж нерген утларак палыме, чакрак лийме шуэш. Тиде кумыл чон гыч лектеш.

Лидия ШАБДАРОВА.

М.Скобелевын фотожо

Если вы нашли ошибку, пожалуйста, выделите фрагмент текста и нажмите <em>Ctrl+Enter</em>.
Опубликовать в Мой Мир
Опубликовать в Одноклассники

Добавить комментарий

Ваш e-mail не будет опубликован. Обязательные поля помечены *