СОЦИАЛЬНЫЙ ИЛЫШ

Шокшышто илаш тӱҥалына

Кодшо кушкыжмын Медведево район Лӱльпаныште котельныйым пашаш колтеныт. Тудым эртыше кеҥежым газ дене ыштымашке кусареныт. 

Олтымо пагыт тений 28 сентябрь гыч тӱҥалын. Республикын рӱдолаштыже, районласе ял ден селалаште шокшым пуышо организаций-влакын пашаштым, шокшым пуымым Марий Элым вуйлатыше Александр Евстифеев шкежак пеҥгыдын терген шога. Тиде кечын республикыште шокшым да ырыктыме вӱдым пуышо пытартыш кум котельныйым пашаш колтымо. Иктыже – Лӱльпаныште. Мландышӱй дене олтымо гыч газыш кусарыме ты котельный шуко пачеран индеш пӧртым, чумыржо 200 наре пачерым, тыгак тулыкеш да ача-ава полыш деч посна кодшо йоча-влаклан верысе рӱдерым, библиотекым, йочасадым, школым, культур пӧртым, Медведевысе рӱдӧ райбольницым ырыкташ тӱҥалеш.

1982 ийыште пашаш колтымо котельныйым пужен чоҥымо годым тӱҥ ден полышкалыше оборудованийым тӱрыс вашталтыме, ныл у котелым шындыме зданийым капитально олмыктымо. Уэмдыме пашан сай велжым шокшым ӱшанлын налаш тӱҥалше верысе калык веле огыл, тыгак еҥ-влакын пӧртышкышт шокшым пуышо предприятийыштат шижыт.

— Котельныйым уэмдымылан кӧра предприятий мландышӱйым кок тӱжем тоннлан шагалрак кучылташ тӱҥалеш. Кызыт «Маркоммунэнерго» ООО-н кидыштыже да обслуживатлымаште 174 котельный шотлалтеш, нунын кокла
гыч 130 утлаже газ дене ышта, 43-шо – мландышӱй дене. Тачысе кечылан чыла котельныйым шокшым пуаш ямдылен шуктымо, 150 котельныйым тӱрыс олмыктымо, чыла муниципальный образованийыште олтымо пагытым тӱҥалме, — палдара «Маркоммунэнерго» ООО-н генеральный директоржо Сергей Белоусов.

Кумданрак — «Марий Эл» газетын
2017 ий 7 октябрьыште лекше номерыштыже лудын кертыда.

А.АНДРЕЕВ.
М.Скобелевын фотожо.

Если вы нашли ошибку, пожалуйста, выделите фрагмент текста и нажмите <em>Ctrl+Enter</em>.
Опубликовать в Мой Мир
Опубликовать в Одноклассники

Добавить комментарий

Ваш e-mail не будет опубликован. Обязательные поля помечены *