УВЕР ЙОГЫН

У семын тергаш тӱҥалыт

5 июльышто Марий Эл Республикым Вуйлатышын пашажым жаплан шуктышо А.Евстифеев РФ Правительстве председатель Д.Медведевын эртарыме тергыме да эскерыме пашам уэмдыме дене кылдалтше селектор совещанийыште лийын. Тушто премьер-министр  2018 ий гыч  кушто лӱдыкшӧ уло да чынжымак кӱлеш, тушто веле тергымашым эртараш тӱҥалме нерген ойлен. Тидын годым ты пашам мыняр гана тергыме да мыняр штрафым пуымо дене огыл, а  лӱдыкшӧ шагалемме дене аклаш кӱлмӧ нерген ушештарен.

«Тергаш мийыме огыл, а , мутлан, колымаш, сусыргымаш, черланымаш шагалемме  але экономикылан эҥгек ышталтме рашемдалтшаш» , – манын элын правительстве председательже.

Тыгак Д.Медведев тачысе кечылан тергыше да эскерыше орган-влакын йодмашышт тоштемыныт, сандене бизнеслан тергымаш деке  пеҥгыдын йодмашым шыжылан шагалемдаш да эн кӱлешанжым веле кодаш кӱлмым палемден.

«Реформын цельже – кугыжаныш могырым тергыме сферыште колымашым да  сусыргымашым 2015 ийлан 50 процентлан шагалемдаш», – иктешлен элын правительствыжым вуйлатыше.

Марий Эл Республикым вуйлатышын пашажым жаплан  шуктышо А.Евстифеев кундемыштына тергыме да эскерыме паша  федеральный дене келшен толшо лийшашыже да тудын республикын экономикыжым вияҥдаш полшышашыже  нерген  ойлен.

«Мемнан задачына –  закон почеш  шуктышаш  пашаштым чыла кучем орган-влак чаткан ыштышт», – ешарен А.Евстифеев.

Арня ончыч республикын правительствыштыжат Марий Элыште тергыме да эскерыме пашаште реформым ышташ кӱлмӧ нерген совещаний лийын. Тунам А.Ефстифеев кундемысе предприниматель-влак сообществын путырак чот да кыртменак тергыме да эскерымылан кӧра бизнеслан эҥгек ышталтме нерген ойлымыжым палемден. Муниципальный кучем орган-влакат утыждене тергымылан вуйым шийыт.

Е.Садовин.

Опубликовать в Одноклассники

Добавить комментарий