МЕР ИЛЫШ

Марий сӱретче — академик.

6  июньышто  Москваште  Российысе сӱрет академийын президиумжо эртен. Тушто Российын сулло, Марий Элын  калык сӱретчыже  Измаил Варсонофьевич  Ефимовым академийын почетан  членжылан сайленыт.

  Измаил Варсонофьевич  — РФ Президентын  Геральдический ушемжын членже. 1997 ий гыч 2011 ий марте  Марий Эл президентын тӱҥ герольдмейстержын  пашажым шуктен. Тудо Марий Элысе тисте ден гербшын (тудым 2006 ийыште Марий Эл Кугыжаныш Погынын сессийыштыже депутат-влак пеҥгыдемденыт), Марий Элысе кугыжаныш награде-влакын, республикысе район-влакын гербыштын авторжо.

Сӱретчын радынаже-влак Российыште да йот  элласе тоштерлаштат аралалтыт. Мутлан, тений апрельыште  Бельгийысе Антверпен оласе  Тачысе искусствын музейже этнофутуризм сынан 30 радынажым налын.

Шукерте огыл Измаил Ефимов дене Марий телевиденийыште передачым ончыктеныт, тыгак  радиоштат шонымашыж дене калыкым палдарен. Пытартыш жапыште тудо творческий паша деч посна республикысе 2006 ийысе  кугыжаныш символикым пӧртылтымӧ йодышым пӱсын нӧлталын.

 — 2006 ийысе Марий Элын символикыжым пӧртылташ кӱлеш (кызыт — короным вуйышкыжо чийыше шем маска – авт.).  Мыйын сӱретлыме ончычсо герб ден тисте (марий тамган – авт.) Российысе ола-влак коклаште эртарыме конкурсышто кокымшо верым налын. Йошкар-Олан гербшымат вашталтыман (кызыт — шӧртньӧ  коронан, тӱкан узо пӱчӧ –авт.).  Чынжым гын рӱдолан гербыштыже ший тӱсан ава пӱчӧ лийшаш.  Йошкар-Олан  да Марий Эл Республикын  кызытсе символжо-влакым  Кугыжаныш геральдический регистрыш пуртымо огыл, садлан тиде йодышым угыч нӧлталман, законым пудыртыде тӧрлыман, — каласен герольдмейстер.

М.СКОБЕЛЕВ.

Снимкыште:  Академийын президентше З.Церетели ден И.Ефимов — президиумын заседанийже годым.

 (Фотом И.Ефимовын еш альбомжо гыч налме.)

 

Если вы нашли ошибку, пожалуйста, выделите фрагмент текста и нажмите <em>Ctrl+Enter</em>.
Опубликовать в Мой Мир
Опубликовать в Одноклассники

Добавить комментарий

Ваш e-mail не будет опубликован. Обязательные поля помечены *