КУЛЬТУР ДА ИСКУССТВО

Рвезе годым чыла курымаш

27 июньышто Российыште Самырык-влакын кечыштым палемдат. Йошкар-Олаште ты пайрем 25 июньышто кумдан эртен. Эн ончыч самырык тукым В.И.Ленин лӱмеш площадьыште погынен. Тушто рӱдолан ансамбльже ден мурызыжо-влак ты пайрем дене погынынышо калыкым саламленыт, пырля мураш, кушталташ ӱжыныт.

Ола мучко икмыняр площадке пашам ыштен. Чавайн бульварыште «Изи Арбат» программе шке йырже чумырен. Тушто самырык толкын, клуб, организаций, вуз ден ссуз-влак шкешт  дене палымым ыштеныт.

Никонов лӱмеш площадьыште вакансий ярминга ден военный службыш контракт дене налме площадке лийыныт. Изи Какшан эҥер воктене кажне кумылан ола мучко шкешотан квест-экскурсийым эртен.  Чарла Кремльыште республикысе историй реконструкций клуб-влак кокла курымысо кучедалмашым ончыктеныт. Ӱдыр-рвезе-влакат ик татлан тудо пагытыш пуреныт, тусо вургемым чиеныт, акрет жапысе саркуралым кучен онченыт.

Эн кугу пайрем Сеҥымаш парк ден В.И.Ленин лӱмеш тӱвыра полат ончылно эртен. Паркыште шахмат, ӱстембал теннис дене мастер-класс-влакым ончалаш йӧн лийын. Медведево район Руэмысе шуко профилян лицейын 9-ше классшым тунем пытарыше Костя Шитников иканаште икмыняр оҥаште шахмат дене сайын модмыжым ончыктен.

Workout площадкыште турникыште чулымлыкым, мастарлыкым ончыктышо-шамыч вийыштым тергеныт. Тушто фристайл да троеборье дене таҥасымаш эртен. Икымше видыште сеҥышыш Андрей Яковлев лектын, кокымшо верым Дмитрий Адиганов, кумшым Манур Хандамов налыныт. Фристайлыште Иван Остроумов ойыртемалтын. Кокымшо верым Юрий Жарковлан, кумшым Андрей Яковлевлан пуэныт.

Скейт-паркыштат велосипед дене мастарын кудалышт моштышо-влак таҥасеныт. Рвезе-шамычын «чоҥештылмыштым» ончен, шӱмат ик татлан шогалын манын каласаш лиеш. Южгунамже нуно моткоч лӱдыкшӧ трюкым ончыктылыныт. Любитель-влак коклаште кумшо Руслан Шальной, кокымшо Леонид Кузнецов лийыныт, а сенышыш Станислав Фахрутдинов лектын. Профессионал-шамыч коклаште икымше верым Антон Степанов налын. Кокымшо вер Андрей Аликовлан, кумшо Тарас Гордиенколан логалын. А эн оҥай да неле трюкым ончыктымаште Владимир Лукиянов ойыртемалтын. Тудлан посна призым кучыктеныт.

Тылын труженикше-влаклан стеле воктене йоча ден ача-ава-шамыч  Самырык-влакын кечыштлан пӧлеклалтше эмблемым пор дене сӱретленыт, тыгак сем почеш йоча мурым палаш тыршеныт. Эн мотор сӱретчылан да мурым палыше-шамычлан тамле пӧлекым кучыктеныт.

Кас велеш В.И.Ленин лӱмеш тӱвыра полат ончылно Йошкар-Олан творческий коллективше-влак калыкым усталыкышт дене куандареныт. А мучаште  «Tiaro» арт-студий оҥай, ӧрыктарыше тул шоум ончыктен.

Лидия ШАБДАРОВА.

М.Скобелевын фотожо.

Если вы нашли ошибку, пожалуйста, выделите фрагмент текста и нажмите <em>Ctrl+Enter</em>.
Опубликовать в Мой Мир
Опубликовать в Одноклассники

Добавить комментарий

Ваш e-mail не будет опубликован. Обязательные поля помечены *