СОЦИАЛЬНЫЙ ИЛЫШ

Адакат травмпункт нерген…

Йошкар-Олаште врач-травматологын икымше кабинетшым 1-ше №-ан поликлиникын базыштыже 1969 ийыште почыныт. А эше 14 ий гыч рӱдолаште травматологий да ортопедий шотышто специлизироватлыме медицине полышым пуымо посна поликлинике паша ышташ тӱҥалын.

Кызыт Йошкар-Оласе 5-ше №-ан поликлиникыш, травмпунктыш, ий еда 37 тӱжем утла пациент медицине полышым йодын толеш, тышечын 20 процентше йоча-влак улыт.

Рӱдолаште илыше-влак тиде поликлинике шотышто шукертак вуйым шийыт: вер шагал, рентген кабинетыш черет кугу…

– Марий Эл Республикын Тазалыкым аралыме министерствыже нине йодыш дене шукертак пашам ышта, – манеш Минздравын эмлыме-профилактикым эртарыме полыш шотышто пӧлкажын начальникше Ираида Ходырева. – Поликлиникын кумдыкшым, тыгак тудын пашажым реорганизацийым ыштен гына йоҥгыдемден кертына. Кечывал стационар отделений ден реабилитаций кабинет-влакым Петров урем, 13-шо а пӧрт адрес дене верланыше ончычсо йочасадыш, 1-ше №-ан поликлиникын реабилитаций отделенийышкыже, кусарена. Тыгак кок поликлиникын бухгалтерийжым иктыш ушена – тидын денат кабинет-влак ярсат. Тушко кокымшо рентгенаппаратым шындена, тыгак врач-травматолог-влакым вераҥдена.

1 август гыч 5-ше №-ан поликлиникын паша графикшат вашталтеш: тудо йӱдым пашам ыштымым чарна. Тидын нерген 20 июньышто лекше газетыштына радамлын возенна ыле.

– Реорганизацийым ыштыме дене пациент-влаклан медицине полышлан эҥерташышт йӧнанрак лиеш, молан манаш гын поликлиникыш толшо чумыр черле гыч кумшо ужашыжым эмлымверыш пышташ логалеш. Стационарын приёмный отделенийышкыже йӱдым толшо пациент-влаклан вигак медицине полышым пуат да, кӱлеш гын, койкыш пыштат.

М.ИВАНОВА.

Если вы нашли ошибку, пожалуйста, выделите фрагмент текста и нажмите <em>Ctrl+Enter</em>.
Опубликовать в Мой Мир
Опубликовать в Одноклассники

Добавить комментарий

Ваш e-mail не будет опубликован. Обязательные поля помечены *