УВЕР ЙОГЫН

Йошкар-Ола троллейбус деч посна кодшаш огыл

Троллейбус

 Йошкар-Ола троллейбус деч посна кодшаш огыл

Кажне кечын рӱдоласе тролейбус-влак 65 тӱжем наре пассажирым шупшыктат, тыгак путырак кӱлешан социальный пашам шуктат, ты транспорт дене ятыр льготник пайдала. Муниципальный предприятий ончылно парым йодыш эре шоген, но кызыт тудо банкротыш лектын кертеш. Чумыр парымже 106 миллион теҥгешке шуэш.

Йошкар-Оласе «Троллейбус транспорт»  предприятийын нелылыкыш логалмыж дене кылдалтше совещанийыште Марий Эл Республикым вуйлатышын пашажым жаплан шуктышо Александр Евстифеев каласен:

«Йошкар-Олан троллейбус транспорт деч посна кодын кертмыж нерген шонымашым вуйда гыч луктын кудалтыза. Тудо экологически яндар да социально кӱлешан, Марий Элын кугешнымашыже улшо транспорт деч  посна кодшаш огыл. Поснак Экологий идалыкыште».

Тыгаяк шонымашым рӱдолан мэрже Евгений Маслов ойлен. Тудо предприятийым арален кодаш чыла ышташ кӱлеш, можыч, эсогыл коштмылан акым кӱзыкташ перна, но  тунамак  республикын правительствыжын полышыж деч посна парымжым ола гына шке вийже дене петырен огеш керт, манын.

Марий Элым вуйлатыше  сайын пашам ышташыже «ТТ» МП-лан мыняр окса кӱлмым мэрийлан, а кузе парышым налаш лийме чыла йӧным троллейбус паркым вуйлатыше-влаклан рашемдаш кӱштен.

«ТТ» МП-н директоржо Александр Ляпуновын мутшо почеш, предприятийын дебитор парымже 82,7 миллион теҥгешке шуэш, кредитор парымже 272 миллион теҥге погынен. Тушеч 115,8 миллион теҥгежым Пенсий  фондлан, 62,8 миллионым Минфинлан, 56 миллионым электровий дене пайдаланымылан, 20 миллион наре теҥгем мландым арендыш налмылан тӱлышаш. Тыгак тудо  предприятийын тылзе еда 25 миллионым ыштен налмыжым да 35 миллион теҥге роскотыш пурымыжым палемден.

Нелылык гыч лекме ик йӧн семын тарифым 20 але утларак теҥге марте кӱзыкташ темлымашат лийын, но Марий Эл Республикын правительстве председательжын икымше алмаштышыже Николай Куклинын мутшо почеш, тиде йӧн келшен огеш тол, вет тудо мыняр кугурак  лиеш, тунар шагалрак пассажир троллейбус дене пайдаланаш тӱҥалеш.

Е.Садовин.

Опубликовать в Мой Мир
Опубликовать в Одноклассники

Добавить комментарий