КРИМИНАЛ

Суд чын ыштымылан шотлен

Марий Элын ончычсо вуйлатышыже Леонид Маркеловын кусараш лийдыме икмыняр лу дене погыжым арестоватлымым Москвасе суд закон дене келшышын ыштымылан шотлен.

Арестоватлыме погын акше 1 миллиард утла теҥгешке шуын. Тидын нерген адвокатше каласен.

Суд Маркеловын ешынлан шотлалтше мланде участке, пӧлем да зданий-влакым – чылаже 23 объектым – арестоватлен. Нуно Марий Элыште да Москваште веле огыл, эше Краснодар крайыште лийыныт. Маркеловын интересшым аралыше-влак судын тиде решенийжылан вуйшиймашым пуэныт. Регионын ончычсо вуйлатышыжын адвокатше погым арестоватлымым тугак закондымылан шотла. Тудын ойлымыж почеш, погым преступный йӧн дене налме манын шонаш амал уке.  

Ушештарена: Леонид Маркелов 235 миллион теҥге взяткым налмылан титаклалтеш. Но тудо шкенжым титаканлан огеш шотло.

Л.Камалетдинова.

Опубликовать в Одноклассники

Добавить комментарий