КУЛЬТУР ДА ИСКУССТВО

Йоча пайрем куаным да порылыкым шарен

1 июнь — Икшыве-влакым аралыме тӱнямбал кече

Йоча пайрем куаным да порылыкым шарен

Кеҥежын икымше кечыже мемнам кече да шокшо игече дене пешыжак куандарен огыл, йӱран лийын гынат, Республикысе курчак театрыште шокшо кумыл вигак шижалтын. Тушто «Изи мӧр пеледыш»  пайрем эртен. Ты гана Марий тӱвыра рӱдерын пашаеҥже-влак мероприятийыш сайын тунемше, спортышто усталыкым ончыктышо икшыве деч посна тазалык шотышто ойыртемалтше да инвалид йоча-влакым ӱжыныт.

Ты пайремыш Бауман лицей, Йошкар-Оласе, Медведево район Руэм кыдалаш, Советский район Ӱшнур школла гыч икшыве-влак чумыргеныт. Ӱдыр-рвезе-влакым каникул тӱҥалме дене РФ Кугыжаныш Думын депутатше С.Солнцева, Марий тӱвыра рӱдерын директоржо Н.Пушкина саламленыт. А Кеҥежын рольжым модшо Э.Лисицына ньога-шамычым йомак тӱняш пуртен. Икшыве-влакым Забияка, Лунтик мурен-куштыктеныт, тӱрлӧ модыш дене модыктеныт.

14-ше №-ан гимназийын «Изи памаш», Татар тӱвыра рӱдерын «Кубэлэк» («Лыве»), Марий тӱвыра рӱдер пеленсе «Юкече» йоча ансамбльлаш коштшо йоча-влак мастарлыкыштым ончыктеныт. Нунын дене пырля начар тазалыкан икшыве-шамыч пырля муреныт, куштеныт, совым кыреныт.

— Илья эргым Бауман лицейыште тунемеш. Тудо ынде икмыняр ий «Кидкопаште – кидкопа»  проектын участникше. Тушто логопед, психолог, дефектолог-влак занятийым эртарат. Проектым Наталья Васильевна Турова вуйлата. А таче тыгай мероприятийым эртарыме дене моткоч чын ыштыме, вет тазалык шотышто ойыртемалтше йоча черле улмыжым шижшаш огыл. Таче кумылна нӧлтшӧ, вет ме чылашт дене пырля мурена, куштена. Тыгак пытартыш жапыште ОВЗ черан икшывылан тӱткышым ойырымо поснак коеш, школыштат поро кумыл шижалтеш: омсам почын пуртат, кӱзыкташ полшат, — мане Марина Ортина.

Варажым кажне йочалан тамле пӧлекым кучыктеныт, «Шӧртньӧ чывиге»  спектакльым ончыктеныт, мучаште чылаштым шовын вӱд гыч шочшо шар-влак шоу дене куандареныт.

Л.ШАБДАРОВА.

М.Скобелевын фотожо.

Снимкыште: 14-ше №-ан гимназийын «Изи памаш»  ансамбльже.

Если вы нашли ошибку, пожалуйста, выделите фрагмент текста и нажмите <em>Ctrl+Enter</em>.
Опубликовать в Мой Мир
Опубликовать в Одноклассники

Добавить комментарий

Ваш e-mail не будет опубликован. Обязательные поля помечены *