КУЛЬТУР ДА ИСКУССТВО УВЕР ЙОГЫН

Ялысе тӱвыра пӧрт-влаклан — окса полыш

Марий Эл Республикыште «Единый Россий» партий чылаже 22 проектым илышыш шыҥдара. Кугу тӱткышым поснак «Верысе культур пӧрт», «Ола илыш», «Йоча спорт», «Изирак ола-влакын театрышт», «Парк-влак» проект-шамычлан ойыра. 

«Верысе культур пӧрт» проектлан Российыште 71 регион эҥерта. Нунын коклаште Марий Эл Республикат уло. Проект окса республикысе культур пӧрт-влакым олмыкташ але тусо материально-технический базым уэмдаш полшышаш. Муниципальный культур учреждений-влаклан 16 миллион теҥге субсидий ойыралтеш. Республикысе Тӱвыра, печать да калык-влакын пашашт шотышто министерстве конкурсым эртарен. Тудым иктешлыме деч вара пале лийын: тыгай полыш дене 23 культур учреждений пайдаланаш тӱҥалеш. Кажне районлан ойырымо окса кугут — миллион шӱдӧ тӱжем утла теҥге.    

30 майыште Медведево районысо тӱвыра да каныме рӱдерыште «Единая Россия» партийын регионысо пӧлкажын еҥже-влак районласе культур отдел, рӱдӧ клуб системе, тыгак культур пӧрт-влакын вуйлатышышт дене вашлиймашым эртареныт. Тушто правительстве председательын икымше алмаштышыже, тӱвыра, печать да калык-влакын пашашт шотышто министр Михаил Васютинат лийын. Тудо субсидийым налше-влак деч могай пашам шукташ тӱҥалмышт, тачысе кечылан мом ыштымышт нерген йодыштын.

Мутланымаш гыч пале лие: субсидийым налше куд культур учреждений (Оршанке, Марий Турек, Юрино, Параньга, Килемар районласе) оралтым тӧрлаш тӱҥалеш, а молышт тӱҥ шотышто тул, йӱк аппаратурым налаш шонат.

— Тӱвыра тӧнеж-влакын проектым илышыш шыҥдарымыштым ме эскераш тӱҥалына. Нунын деч тылзе еда отчетым йодына, — палемдыш министрын алмаштышыже Александр Иванов.

 

Галина Рукавишникова, Килемар район:

— Проект оксам районысо культур пӧртын леведышыжым олмыкташ колтена.

Сергей Онучин, Оршанке район:

—  Субсидий окса дене Шулко, Упшо, Тошто Крешын культур пӧртлаште леведышым тӧрлаш, а посёлкысо тӱвыра да каныме рӱдерлан тул аппаратурым налаш шонена.

Светлана Тырышкина, Марий Турек район:

— Проект дене толшо шийвундо дене «Заря» тӱвыра да каныме рӱдерын изи залыштыже кум окнам, тыгак омсам тӧрлаш, тул аппаратурым уэмдаш шонена. Тиддеч посна кок гармоньым, ик баяным да компьютерым налына.

А.Байкова.

А.Иванован фотожо.

Если вы нашли ошибку, пожалуйста, выделите фрагмент текста и нажмите <em>Ctrl+Enter</em>.
Опубликовать в Мой Мир
Опубликовать в Одноклассники

Добавить комментарий

Ваш e-mail не будет опубликован. Обязательные поля помечены *