КУЧЕМ УВЕР

Жапыштыже шуктымылан ӱшанат

Еҥ-влакым чот тоштемше пӧртла гыч вес вере илаш кусарыме программым илышыш пуртымым тергымаш Общероссийский калык фронтын Марий Элысе региональный отделенийжын ик эн тӱҥ пашажлан шотлалтеш.

ОНФ-ын чолга еҥже-влакын эртарыме мониторингышт южо вере тиде паша кӱрылт кертеш манын ончыктен, вет икмыняр администрацийыште, тоштемше пӧртым пужымеке, еҥ-влаклан эрежак огыл  чыла шотыштат йӧнан илыме верым пуат. Мутлан, Звенигово районысо Мочалище поселкышто еҥ-влакым илаш келыштарыме ончычсо склад пӧлемыш кусареныт.  Пӧрт-влакым чоҥымо годымат ятыр экшык вашлиялтеш.

– Еҥ-влакым чот тоштемше пӧртла гыч кусарыме йодышым шукерте огыл Госсовет ден Мониторинг шотышто комитетын иквереш эртарыме заседанийыштыже каҥашеныт. Тудым Россий президент, Общероссийский калык фронтын лидерже Владимир Путин вуйлатен. Тушто палемденыт: еҥ-влакым чот тоштемше пӧртла гыч кусарыме паша 2017 ий 1 сентябрь марте мучашлалтшаш. Регионыштына муниципальный кучем-влак программым илышыш пурташ палемдыме срокым огыт пудырто да жапыштыже шуктат манын ӱшанена, – ойлен Марий Элыште ОНФ-ын региональный отделенийжын сопредседательже Руслан Гизатуллин.

Л.Камалетдинова.

Опубликовать в Одноклассники

Добавить комментарий