МЕР ИЛЫШ УВЕР ЙОГЫН

Эрласе кечышт ӱшанле

Александр Евстифеев: «Звениговскийын» ончыкылыкшо кажне паша кечын лектышыж дене кылдалтын» .

Республикым вуйлатыше 1 Май пайрем деч варасе икымше паша кечыжым  «Звениговский» калык предприятий-влак ушемыш пурышо озанлыкла дене палыме лияш ойырен. Ушемын озанлыкше-влак Марий Эл Республикыште, пошкудо Татарстаныште верланеныт.

«Звениговский»  СПК-н проходнойжо воктене Александр Евстифеевым предприятийыште тыршыше, смене деч ярсыше чыла пашаеҥ вашлийын. Погынышо-влак дене мутланымыж годым регион вуйлатыше палемден: «Тендан предприятийыште вольык ашныме да кургым ямдылыме гыч тӱҥалын, ямде продукцийым ужалыме марте чумыр паша шукталтеш. Лач тыштыжак ушемын сеҥымашыже. Предприятийын экономикыже виян, тыште шке социальный программе илышыш шыҥдаралтеш. Санденак еҥ-влак эрласе кечыш ӱшанлын ончат. «Звениговскийын» шкенан республикысе да пошкудо Татарстанысе шуко производственный участкылаштыже мо ышталтеш – чылажат ик лектыш дене кылдалтын». Александр Евстифеев агрохолдингын пашаеҥже-влаклан сеҥымашым тыланен, эртыше да шушаш пайремла дене саламлен.

Вара Александр Евстифеев ушем вуйлатыше-влакын ужатен коштмышт почеш «Звениговский» шыл комбинатыште, сӧсна да тӱкан шолдыра вольыкым ашныме комплекслаште лийын.

Тысе агрохолдингын  «Звениговский» СПК ден «Звенигово шыл комбинат» ООО-жын талукаш выручкышт 13 миллиард утла теҥгешке шуэш. Тыште идалыкыште 47 тӱжем тонн сӧсна, 45 тӱжем тонн ушкал да 2,5 тӱжем наре тонн имне шылым ыштен налыт. Чыла шылым шкеак переработатлат. Ямде продукций гыч 80 процентше Марий Элыште, Татарстаныште, Нижегородский ден Киров областьлаште верланыше 500 шке кевытлаште ужалалтеш.   

Агрохолдингыште нимогай проблемат уке манаш ок лий. Лач тудыжымак каҥашен Александр Евстифеев «Звениговский» калык предприятий-влак ушем вуйлатыше-шамыч Иван Казанков ден Сергей Казанков дене пырля.

Кызыт агрохолдинг вуйлатыше-влак роскотым, поснак энергийым кучылтмым иземдыме, ужалыше сеть-влакын пашаштым семдыме, у логистике схемым ыштыме шотышто ятыр пашам ыштат.

Кургылык кушкылым ончен кушташ мланде кумдык ситыдымылан кӧра «Звениговский» ОНП шке жапыштыже пошкудо Татарстанысе почеш кодшо кок озанлыкым – «Хузангаевский» СХПК ден «Алексеевский» НП-м шке шулдыржо йымаке налын. Кызыт нине кок озанлыкшат икшырымын вияҥын толеш. Тушто Александр Евстифеев Иван Казанков дене пырля икымше пел кечыште лийын.

Регион вуйлатыше 800 вуй тӱкан шолдыра вольыкым ашныме комплексым да «Хузангаевский» СХПК-н перерабатыватлыме цехшым, тыгак «Алексеевский» НП-ште модуль технологий почеш чоҥалтше ушкал комплексым ончен.

Татарстаныште лиймыж годым регион вуйлатышым Алькеевский да Алексеевский муниципал район вуйлатыше-влак ужатен коштыныт.

В.Смоленцев.            

Опубликовать в Одноклассники