УВЕР ЙОГЫН

Кугече кечын лӱҥгалтет, пиалан лият…

Марий тӱвыра рӱдерын эртарыме «Кугече лӱҥгалтыш» конкурсышто Параньга район Усола тӱвыра пӧртын коллективше Гран-прим сеҥен налын. Тудым Екатерина Кузьминых вуйлата.

Таклан огыл марий Кугечылан яллаште эре лӱҥгалтышым сакеныт. Тудо айдемым кӱшыл ю-вий дене ушышо символлан шотлалтеш.  А ялыште лӱҥгалтыш кумылым нӧлташ, модаш, мутланаш погынымо вер лийын.

Марий тӱвыра рӱдер ынде кокымшо ий почела тыгай конкурсым эртара. Кодшо рушарнян Йошкар-Оласе рӱдӧ каныме паркыште тудо иктешлалте. Тушко вич участник коллектив толын. Чылаже конкурсыш кандаш коллектив ушнен. Марий тӱвыра рӱдерын пашаеҥже-влак кодшо арнян кажне кечын гаяк нунын деке верыш миеныт да творческий пашаштым акленыт. Пайрем йӱлам эртарыме радамым, вер-шӧрым тӱзатымым, творческий мастарлыкыштым онченыт.

Иктешлыше пайремым районла гыч толшо самодеятельный фольклор коллектив-влак сӧрастараш полшеныт. Ончыч погынышо-влакым Марий Эл Республикын тӱвыра, печать да калык-влакын пашашт шотышто министрын икымше алмаштышыже Владимир Актанаев, Марий тӱвыра рӱдер вуйлатыше Наталья Пушкина саламленыт.  Йӱла дене кылдалтше модыш, конкурс, марий муро-куштымаш дене кумылым кумылым нӧлтеныт. 

Конкурсышто ойыртемалтше-влакым диплом да шарнымашан сай пӧлек вученыт. Тыге, «Эн сай лӱҥгалтыш» номинацийыште Волжский районышто  Ӱлыл Азъял лудмывер пеленсе «Сельчанка» ӱдырамаш клуб (вуйлатыше – Лидия Романова),  ты район гычак  Руш Шайра ял клубын  «Шайра» коллективше (вуйлатыше – Нина Николаева) «Эн сай марий модыш» номинацийыште палемдалтыныт. Тиде кок кундемыште лӱҥгалтышым чынжымак ойыртемалтшым ыштеныт(снимкыште).  А теве Провой велысе Чакмарий кундем гыч толшо-влак «Эн сайын марий койышым ончыктышо» номинацийыште ойыртемалтыныт.

Кокымшо вер  Советский район Кукмарий тӱвыра пӧртын коллектившылан  (вуйлатыше – Надежда Волкова) логалын. Икымше верыш У Торъял район Кузнеч ялысе тӱвыра пӧртын ансамбльже (вуйлатыше – Татьяна Березина) лектын.
Сеҥыше радамыш логалше коллектив-влакым диплом да шергакан пӧлек дене палемденыт.

С.Носова.

Снимкылаште: Гран-прим сеҥен налше коллективым вуйлатыше Е.Кузьминых саламлымашым налеш.

М.Скобелевын да Р.Николаеван фотошт.

Опубликовать в Мой Мир
Опубликовать в Одноклассники