УВЕР ЙОГЫН

«Мыйын йӧратыме элем»

Т.Евсеев лӱмеш национальный тоштерыште «Мыйын йӧратыме элем» ончер почылтын. Тудо марий поэт, прозаик да кусарыше Чалай Васлийын (Василий Фёдорович Чегаев) шочмыжлан 100 ий теммылан пӧлеклалтын.

Чалай Васлий – Кужэҥер районысо Визым ялын шочшыжо. Марий пединститут пеленсе рабфак деч вара М.Горький лӱмеш Москосо литературный институтым тунем лектын. Кугу Отечественный сарыште лийын. Вара «Марий коммуна» газетыште  литератур редакторлан ыштен. «Очыко» журналыште, Марий гостелерадиошто, Марий книга издательствыште  редакторлан тыршен. Калык творчество пӧртыштӧ методистын пашажымат шуктен.

1951 ий гыч СССР Писатель ушемын членже лийын. Марий да руш йылме дене 15 почеламут книгам савыктен луктын. Калыкыште тудо мурым возышо поэт, тыгак прозаик семынат чапланен. А.Пушкинын, М.Лермонтовын, Т.Шевченкон, Н.Некрасовын да моло руш авторын произведенийлажым кусарен.

Марий АССР Верховный Совет Президиумын Чап  грамотшо (1951, 1967) дене палемдалтын. Тудын шарныме амал дене шочмо Визым ялыште  «Чалай йолгорно» литературный пайрем кажне ийын эртаралтеш. Верысе школышто В.Чалайлан пӧлеклалтше тоштер пашам ышта. Визым ялыште ик урем тудын лӱмжымат нумалеш.

Выставкыште ӧрыктарыше фотодокументальный материал, рукопись, серыш-влак, национальный тоштерын фондшо, поэтын личный архивше гыч, шкенжын веле огыл, поэт йолташыже-влак М.Казаковын, Г.Матюковскийын савыктышышт ончыкталтыт. Ончерым поэт да журналистын илышыже да пашаж дене кылдалтше  тӱрло арвер дене пойдарыме. 6 май марте пашам ышташ тӱналеш.  

С.Носова

Снимкылаште: Чалай Васлийлан пӧлеклалтше ончерыште.

М.Скобелевын фотожо.  

Опубликовать в Одноклассники