УВЕР ЙОГЫН

Маркеловым кученыт


ТАСС Российысе увер агентствын увертарымыж почеш, 13 апрельыште РФ Следствий комитет Марий Эл Республикын ончычсо вуйлатышыже Леонид Маркеловым 250 миллион теҥге взяткым налаш тӧчымыжлан кученыт.

ТАСС-лан тидын нерген ты деланак вес фигурантше – предприниматель Николай Кривашын адвокатше Игорь Трунов каласен.

«Тиде дела шотышто кумытын эртат: Маркелов, тудым кученыт, тыгак взяткым пуышо-влак предприниматель Николай Криваш ден «Регион 12» верысе телеканал вуйлатыше Наталия Кожанова. Кызыт Москваште Маркеловын ӱдыржын пачерыштыже да пелашыжын пӧртыштыжӧ обыск кая. Обыск Марий Элыштат илыме верыштыже эрта», – увертарен адвокат.

Трунов палемден: кызытеш Кривашым кучен огытыл, молан манаш гын тудо вес элыште ила. Уголовный делам РФ УК-ын кум статьяже почеш 12 апрельыште тарватеныт – тиде 290-ше статьян 6-шо частьше дене келшышын (“Получение взятки в особо крупном размере”), 291 статьян 5-ше частьше (“Дача взятки в особо крупном размере”) да 291.1 статья дене келшышын (“Посредничество во взяточничестве”). Тудын делажым РФ Следствий комитетын поснак кӱлешан дела-влак шотышто следователь Степанов вӱда.

Адвокатын шонымыж почеш, лишыл жапыште Маркеловым Москвашке следствий пашам эртараш да наказатлышаш мерым лукшашлан наҥгаят. Тылеч ончыч тудым ФСБ-н Марий Элысе управленийышкыже «Птицефабрика Акашевская» агрохолдинг дене кылдалтше коррупционный дела шотышто показанийым пуаш ӱжыктеныт.

Изарнян Марий Эл правительстве пӧртыштӧ обыск эртен.

Л.Камалетдинова.

 

Опубликовать в Одноклассники