Ластовка в Йошкар
КУЛЬТУР ДА ИСКУССТВО

Тудын чонжо шочмо кундем пелен

Март мучаште мемнан землячкына, Российын сулло, Татарстан ден Марий Эл Республикын калык артистше, Казань консерваторийын профессоржо Галина Ластовка (Окунева) моло ийласе семынак

шкенжын тунемшыже-влакын мастарлыкыштым И.Палантай лӱмеш колледжын залыштыже ончаш темлыш. Педагог семын тудо студент-влак деч пеҥгыдын йодеш. Кажне шошым нуно отчет концертым пуат, да тиде зачет программе огыл, ойырен налме вес произведений лийшаш улыт. Тыге ончыкылык сеҥымашлан негыз консерваторийыштак пышталтеш. Г.Ластовкан тунемшыже –влакат шкеж семынак тӱнямбал кӱкшытыш лектыт. Каласыман, таче Э.Сапаев лӱмеш опер да балет театрын опер солистше-влак коклаштат тудын тунемшыже ятыр.
7 апрельыште Г.Ластовка Йошкар-Олашке усталыкшым йӧратыше да жаплыше-влак дене вашлиймашке лӱмын толын ыле. А тудыжым А.Евсеев лӱмеш национальный тоштерын пашаеҥже Ольга Требушкова ямдылен.
Музейыш пурымекше, йырваш ончалын, Галина Трофимовна чаманенрак пелештыш: «Мыняр жап мый тыште лийын омыл! Училищыште тунемме годым тышке чӱчкыдын коштынна. А кызыт, толын, чылажымат ласкан ончен савырнаш эре жап уке».
Музейым вуйлатыше Л.Смирнован, республикысе культур, печать да калык-влакын пашашт шотышто министрын икымше алмаштышыже В.Актанаевын шерге унам саламлен вашлиймышт деч вара тиде радамыш Шернур кундемысе калык лӱм дене Т.Пакеева (снимкыште), Йошкар-Олаште Шернур землячестве лӱм дене С.Мамаев, «Марий Эл» газет редакций лӱм дене тиде корнылам возышо ушнышт. Мутат уке, шокшо вашлиймаш лие шке жапыштыже училищыште пырля але ик жапыштырак тунемше-влак дене. Тидыже Галина Трофимовнам уэш самырык жапышкыже пӧртылтыш. А тудо Калык усталык пӧртыштӧ мурымо, Марий Эл Республикын чапшым Москваште аралыме да шуко муро дене ушеш лакемалт кодын. Л.Сергеева туныктышо, М.Макарова ик сценыште мурышо семын шуко шокшо шомакым пӧлеклышт.
Г.Т.Ластовка нерген такше книгам возыман. Марий кокла гыч тыгай кӱкшытан, тӱнямбал кумдыкыш лекше мурызо тудо икте гына, ончыкыжым эше кунам тыгайже лиеш – каласаш йӧсӧ. Видеопрезентацийыште ончымо фотосӱрет кокла гыч шукыжо вес эллаште модмо спектакль але пырля мурышо-влак дене кадр улыт ыле. Кугешныме кумыл лектеш, чынжымак. Тыгодымак тудо тыгай проста айдеме. Марла сайын ойла. Марий улмыж деч нигунам вожылын огыл.
— Консерваторийышкыжат Казаньыш мый мӧҥгӧ деч тора огыл да пуренам,- рашемда Галина Трофимовна. – Шочмо кундем деч нигунам торлен омыл. Тачат марий мурым мурем, книга шӧрлыкыштем марий поэзий книга-влак шогат. Шонемжат марла, векат. Мый нигунамат, мутлан, Америкыш илаш ом кай. Йошкар-Олаш толын, вокзалыште волем да уже шочмо кундемыште улмым шижам, тыште южшак весе. А вес могырым, кеч-кузе сайын койыт гынат, ме вес кундемыште садак ӧрдыж гыч толшо улына, мыйын фамилием нунын гай огыл…
Галина Ластовка Юмын пуымо талантшым кечын «таптен» толмыжлан кӧра искусствышто тыгай кугу кӱкшытыш шуын. Консерваторий деч вара шым ий тудо Г.Тукай лӱмеш Татар кугыжаныш филармонийын солист-вокалистше лийын. 1980 ийыште М.Джалиль лӱмеш Татар опер да балет театрыш куснымыж годым тыште кандаш меццо-сопрано улмаш! Ынде шоналтен ончыза: могай конкуренцийым сеҥен лекташ кӱлын.
Галина Трофимовна Ластовка (Окунева) дене кажне вашлиймаш – тиде событий! Жалке тыгайже шагалрак лиеш. Тудо мемнан республиклан искусствым вияҥдымаште эше пеш полшен кертеш ыле. Но мемнан театр тиде йӧным ала-молан огеш кучылт. Ме шукыж годым шкенам да шкенан талантан еҥна-влакым кӱлеш семын аклен огына мошто.
Мый гын журналист семын ончыкыжат вашлияш ӱшаным кучем.
Светлана БЕЛКОВА.
М.Скобелевын фотожо да фоторепродукцийже.
«Галина Ластовка великолепно спела партию Кончаковны, партию в высшей степени сложную: нужны высокие вокальные данные, культура пения, безупречная постановка голоса – академизм в хорошем понимании этого слова. Зрители все это услышали в исполнении артистки из Казани, ровно как увидели интересную актрису, создавшую живой образ половчанки, имевшей несчастье полюбить русского князя Владимира Игоревича» . (Е.Жиголев)

Если вы нашли ошибку, пожалуйста, выделите фрагмент текста и нажмите <em>Ctrl+Enter</em>.
Опубликовать в Мой Мир
Опубликовать в Одноклассники