СЫЛНЫМУТ

«Унала вашлият тый кажным»

Николай Золотарёв.

 Кö титакан?

Ӱшаненна — лиеш коммунизм.

Кумыкталт порволен социализм.

Титакан мо вара коммунист?

Те шкежат лийында антихрист.

 

Ужашлалтын печкалтын элна —

Чот куаныш касвел тушманна.

Титакан мо вара коммунист?

Те шкежат лийында антихрист.

 

Чылт шаланышт совхоз ден колхоз.

Шурнывечын оза- нöргö кож.

Титакан мо вара коммунист?

Ме шкежат лийынна антихрист.

 

Комбайн йўкым монден пасужат.

Шўлыкаҥын мура турийжат.

Титакан мо вара коммунист?

Ме шкежат лийынна антихрист.

 

Азиат-влак пареҥгым пукшат,

Негр-шамыч олмаштым темлат.

Титакан мо вара коммунист?

Ме шкежат улына антихрист.

 

Кўлдымашыш лектеш йылмынат.

Рушла вел чокия ньоганат.

Титакан мо вара коммунист?

Ме шкежат улына антихрист.

 

«Ава» мутым «мама» вашталтен,

«Поро кечым» «Привет!» пызырен.

Титакан мо вара коммунист?

Ме шкежат улына антихрист.

 

Утыш лектын марий газетна,

Интернет ден смартфон — пелашна.

Титакан мо вара коммунист?

Ме шкежат улына антихрист…

 

Неле-йöсым садак сеҥена!

Тек лиеш пиалан илышна!

Тый ит сыре мылам, коммунист.

Огына лий айста антихрист!

                           09.01.2016.

         

 Кум ошкыпу

Эҥер сер ўмбалне, аркаште,

Шога шыпак кум ошкыпу.

Шогат лач шўжар ден акала,

Мардежлан сеҥаш огыт пу.

 

Ужар кидышт дене кыртменак

Кученыт, вашла чот öндал,

Да вожыштым келгыш колтеныт —

Нимо огеш керт сўмырал.

 

Ужаш пернен шуко осалым:

Пунчен южгунам озыркан,

Когартыш волгенчын тул салым,

Лупшен шучко йўр, шолеман.

 

Парчашкышт ок тол кеҥеж водын

Шиялтыш йўкан шўшпыкат,

Жаплан шарналташ гына кодын

Кукун тушто гай мурыжат.

 

Эше шукертак огыл тыште

Ял илыш гўжлен йырымваш,

А кызыт пуста, йöршын тымык,

Огеш лий нигöм вашлияш.

 

Тугеже кöлан шўшпык йўкшö?

Кукужо кöлан мурышаш?

Лачак эртараш кужу йўдым

Толеш южгунам сут вараш.

 

Ик укшышто шўйшö лўҥгалтыш

Кеча кычыр-кочыр мурен,

Вет тиде мардеж чылт йочала,

Ораде, шинча лўҥгалтен.

 

Кугече пайрем годым калык

Гўжлен тыште кутко ешла.

Йöратыше ўдыр ден каче

Сöреныт келшаш курымлан.

 

Эҥер сер ўмбалне, аркаште,

Шога шыпак кум ошкыпу.

Чыла эртен кодын тораште,

Нигö йўкымат огеш пу.

 

Кунам мый ужам кум пушеҥгым,

Ушем гыч ок лек йомшо ял.

Ала лӱмжымат палынет гын,

От му, картыштат ит кычал.

 

Тыгайжым Россий мланде мучко

Огеш лий шотлен шукташат.

Шонет гын, чонлан лиеш шучко:

Эше мыняр ял-влак пытат?!

                              24.02.2016.

Марий Элем

Марий Элем, улат ача гай,

Улат йöратыме ава.

А мый улам изи йочат гай,

Мылам тый — кече да кава.

 

Марий Элем, улат ватем гай:

Ӱма ден, чес ден вашлият.

Пыжаш-помышышкет вашкем гын,

Ньогала шокшын öндалат.

 

Марий Элем — кугезе тукым,

Онарле, чоткыдо, уста.

Ушештарет тый алте тумым,

А меже — нöргö росота.

 

Марий Элем, молан гын тыйым

Ӱшанлын чот йöратена?

Чон-садыштет моткочак тымык.

Ме тушто шўшпык улына.

 

Унала вашлият тый кажным,

Ӱстел коклаш пуртен шындет,

Луктат пурам, шаньгам да кажным,

Команмелна дене сийлет.

 

Йолташла кидпўан гыч налын,

Шурнан пасуш луктат вара.

Кечыйолеш рўалт-рўпшалтын,

Чўчкен, йорга турий мура.

 

Тунам, шымлен, шинчат ончальым

Да ужым пылдыме кавам,

Терке гай Мўшылым, кандалгым,

Пеледше олык ден чодырам.

 

Улат гын тый — лышташ ужарге.

Улат гын тый — киндат шуэш.

Улат гын тый — кечат оярын

Изи йочала шыргыжеш.

 

Марий Элем, пыштен шепкашкет,

Тый тўрлö калыкым рўпшет,

Пуртен шынден ўстел коклашке,

Шунен-шунен, чылам сийлет.

                              2.01.2017.

Кö титакан-2

Толын лектым шочмо ялыш

Адакат шижде-годде.

Шоҥгыракше мыйым палыш,

Ошкыл ыш эрте ужде.

 

Куанен ончем уремым:

Йомын йöршын лавыра.

Весе ишыктыш чонемым,

Шым шоналте, аҥыра.

 

Ну, кушечын лавыраже?

Ну, кушечын лакыла?

Шаланеныс колхознаже,

Шарналтеш лач омыла.

 

От кол ынде трактор йўкым,

Ок кудалышт самосвал,

«Беларусьын» чонжо йўкшыш,

Муын вес озам «КамАЗ».

 

Тек колхоз чумалтыш йолжым,

Ял ила, шўлаш тöча,

Лач ньогалан лийын йорло —

Кодын лач кум-ныл йоча.

 

Улыт чапле сурт-оралте,

Черепице шовычан.

Ончалат умбач-тора гыч —

Товатат, йыма шинчат.

 

Но, ужат: ялет шуэмын,

Пöрт ден пöрт кокла — чара.

Пагыт куптыреш шоҥгемын,

Ятыр сурт шинча яра.

 

Шукыштын тыштак прописке,

Но илат вес адрес ден.

Пöрт воктен вуча чал писте

Шке озажым, вуй сакен.

 

Лектым ял воктеке нурыш.

Нур мо? Такыр да куэр,

Тыште — пўнчö, тушто — нулго,

Шондашла пошен нолгер.

 

Лийын ончыч шурнывече,

Шочын пырдыж гай шыдаҥ.

Ончалат тыге йырвелыш —

Пудешталт лектеш шыдат.

 

Шоналташ гын, кöн титакше,

Кöм шыдештын вурсыман?

Чылажат ышталтын такше

Тўвыт шинчаончылан.

 

Уш гына чыташ ок кўштö.

Чаманен шортеш шўм-чон.

Мом шонат гын тушто, кўшнö?

Куш онча мемнан закон?

 

Умылаш моткочак шучко-

Умылашак тыршена:

Йомдаренна пешак шуко —

Мом эше йомдарена?

        

09.03.2017

Опубликовать в Мой Мир
Опубликовать в Одноклассники