ТАЗАЛЫК

1 декабрь – СПИД ваштареш кучедалме тӱнямбал кече

27 ноябрь гыч 8 декабрь йотке СПИД да инфекциян моло чер ваштареш кучедалме, профилактикым эртарыме республикысе рӱдерыште ВИЧ-инфекций профилактике шотышто «шокшо линий» телефон пашам ышта, тудын номерже: 73-00-68. 

Тений СПИД ваштареш кучедалме тӱнямбал кече «Тазалыклан права» темылан пӧлеклалтын. Кажне еҥ, самырык ма илалше, поян ма йорло, таза лияш праван.

Тазалыкым аралыме системе чарныде уэмдалтеш гынат, ВИЧ-инфекций ынеж чакне, тудо кызытат элна мучко эше шуко калыкым авалта. Таче Российыште ВИЧ-инфекциян 908 425 черле ила.

Марий Элыштат ситуаций начар, черланыше-влакын чотышт ий еда кушкын толеш. 2016 ийыште ВИЧ дене черланыме 132 случайым регистрироватлыме гын, тений 10 тылзе жапыште – 141 случайым. А СПИД эпидемий тӱҥалме деч вара ВИЧ-инфекцийын 2400 случайжым регистрироватлыме. Кызыт диспансер учётышто 1121 черле шога, нунын кокла гыч 42 процентше наркотикым инъекций йӧн дене колтышо-влак улыт, 40 процент наре черле Волжск олаште ила. Эпидемий жапыште республикыштына ВИЧ-инфекциян 402 еҥ илыш гыч каен, СПИД 99 еҥын ӱмыржым кӱрлын.

ВИЧ-инфекцийым рашемдыме ик эн тӱҥ йӧнлан тестирований шотлалтеш. Тудым кумылан кажне еҥ СПИД-рӱдерыште (Йошкар-Ола, Келшымаш урем, 95) 8 гыч 16 шагат марте шуматкече да рушарня деч моло кажне кечын яра да анонимно эртен кертеш. Регистратурын телефон номерже: 63-05-80.

М.ИВАНОВА.

Если вы нашли ошибку, пожалуйста, выделите фрагмент текста и нажмите <em>Ctrl+Enter</em>.
Опубликовать в Мой Мир
Опубликовать в Одноклассники