Путин с Евстифеевым
УВЕР ЙОГЫН

Марий Эл Республикым вуйлатыше вашталтеш

2017 ий 6 апрельыште Россий президент В.Путин «Марий Эл Республикым Вуйлатышын полномочийжым жап шумо деч ончыч пытарыме нерген» Указеш кидпалыжым пыштен. Тидын нерген эн ончыч уверым http://www.kremlin.ru/ сайыште вераҥдыме ыле. Тушто ойлалтеш: «Марий Эл Республикым Вуйлатыше Л.И.Маркеловын жап шумо  деч ончыч полномочийжым пытарыме нерген йодмашыжлан кӧра да  «Россий Федерацийысе  субъект-влакын кугыжаныш кучем законодательный (представительный) ден исполнительный орган-влакым  организоватлыме общий принцип-влак нерген» 1999 ий 6 октябрьысе  184-ФЗ-№-ан  федеральный законын 19-ше статьяжын  9-ше пунктшын «а» подпунктшо да 1-ше пунктын «в» подпунктшо дене келшышын, пунчалам:

1.Марий Эл Республикым Вуйлатыше Л.И.Маркеловын кумылжым шотыш налын, тудым отставкыжым приниматлаш.

2. Марий Эл Республикын Вуйлатышыжым сайлыме еҥын должностьыш шогалмешкыже, жаплан, Марий Эл Республикын   Вуйлатышыжын пашажым шуктышылан Александр Александрович Евстифеевым шогалташ.

3.Ты Указ тудым подписатлыме деч вара вийыш пура.»

Тиддеч ончыч  В.Путин Александр Александрович дене вашлийын да  тудын дене Россий Федерацийын ик субъектше – Марий Эл Республик — нерген  мутланаш шонымыж нерген ойлен. «Кызыт тугай ситуаций, республикым вуйлатыше тудым вес паша участкыште кучылташ йодеш. Леонид Игорьевич (Маркелов) ынде 16 ий Марий Элыште да паша вержым вашталтынеже. Тидлан кӧра мыйын темлымашем да йодышем уло: тений сентябрьыште сайлымаш марте те республикым вуйлаташ  тӱҥалыда мо, а тудым иктешлыме лектыш почеш сайлымаш кампанийыш ушнеда мо?»

А. Евстифеев Владимир Владимировичлан тыгай кугу чапым да ӱшаным ыштымыжлан таум ойлен:  «Россий Федерацийын составыштыже улшо национальный республикылан да национальный республикыште пашам ыштымаш могай ответственность да путырак серьезный улмым  мый сайын умылем. Сандене тыгай кӱштымашда лиеш гын, чыла опытем кучылтын, тудым шукташ ямде улам»,- манын.

Е.Садовин.

Если вы нашли ошибку, пожалуйста, выделите фрагмент текста и нажмите <em>Ctrl+Enter</em>.
Опубликовать в Мой Мир
Опубликовать в Одноклассники