УВЕР ЙОГЫН

Мо лийын – чыла аралат

10 мартыште Российысе архив-влакын кечышт палемдалтын. Тудын вашеш Йошкар-Оласе Творческий ушем-влакын пӧртышкышт республикысе архив-влакын пашаеҥышт погыненыт ыле. Тушто «Архив-влак, кугыжаныш да обществе: пырля пашам ыштыме опыт «йыргешке ӱстел» йыр мутланымаш эртен.

Кеч-могай пайрем саламлымаш гыч тӱҥалеш. Туштат, Марий Эл Республикын Кугыжаныш архившын директоржо Александр Одинцов мероприятийым почшыла, ончыч погынышо-влакым профессиональный пайрем дене саламлен. Тудын ойлымашкыже Марий Эл Кугыжаныш Погын председательын алмаштышыже Анатолий Иванов, тӱвыра, печать да калык-влакын пашашт шотышто министрын алмаштышыже Александр Луничкин ушненыт. А вара доклад-влак йоҥгалтыныт. Историй науко доктор, профессор, Российысе историк-архивист-влакын обществыштын региональный пӧлкажын правленийжым вуйлатыше Ананий Иванов ученый историк ден архивист-влак коклаште  сай кыл улмо нерген ойлен. Вет шанче пашаеҥ-шамычлан архив документ-влаклан чӱчкыдын эҥерташышт логалеш.   

Республикысе кугыжаныш архивын документше-влакым кучылтмо да савыктыме пӧлка вуйлатыше Алевтина Сергееван ойлымыж почеш, пытартыш жапыште посна еҥ-влакат шке родо-тукымышт дене кылдалтше материалым фондлаште кычалаш кумылаҥыныт. Марий кугыжаныш университетын археолого-этнологический шымлымаш рӱдержын пашаеҥже Александр Соколовын палемдымыж почеш, пытартыш жапыште поснак метрический книга-влакым шерыт. Нунат архивын фондыштыжо аралалтыт.

Каласен кодыман, республикыште тӱрлӧ документым арален кодымо шотышто кугыжаныш, муниципальный ден ведомственный архив-влак пашам сайын ыштат. Мутлан, Кугыжаныш Погынат эртыше пагыт дене кылдалтше материалым архив пашаеҥ-влаклан аралаш пуа. А садышт кажне кечын шуктымо пашашт дене калыкнан историйжым арален кодаш полшат манашат лиеш. Моло докладат лач тидымак пеҥгыдемденыт.

 «Йыргешке ӱстел» годым тыгак Марий Элын Аудиовизуальный документаций кугыжаныш архившын тоштержын Личный состав шотышто документым да кинофотобоорудований экспозицийым аралыме рӱдержын фондшо гыч чумырымо «Неожиданные находки» ончерым да «Отечество – моя святыня» виртуальный фотоончерым ужаш йӧн лийын.

С.Носова. 

Опубликовать в Одноклассники

Добавить комментарий