КАЛАСЕ, "МАРИЙ ЭЛ"

Пашаш огыт нал…

 Ӱдырем институтым тунем лектын да пашам кычалеш. Пашаш пурымо годым кызыт ятыр организацийыште испытательный срокым палемдат.Ты шотыштак рашемдынем: закон почеш испытательный срокым  палемден кертыт мо?

А.Морозова.

Кужэҥер район.

Йодышлан Йошкар-Оласе прокурорын кугурак полышкалышыже Наталья Пузырева вашештен:

– Уке, тыгай условийыште испытательный срок палемдалтшаш огыл. Россий Паша кодекс дене келшышын, кугыжаныш аккредитациян образовательный программе-влак почеш кыдалаш профессиональный але кӱшыл образованиыйым налше, да идалык жапыште  икымше гана пашаш пурышо еҥлан закон почеш испытательный срокым палемден огыт керт (Рашрак Паша кодексын 70-ше ст. ончыза).

Паша правам пудыртымо гын, Марий Эл Республикын Кугыжаныш паша инспекцийышкыже (Йошкар-Ола, Ленинский пр. 24 А), прокуратур органлашке, тыгак Советский районысо прокуратурыш (Советский поселко, Свобода урем,5) вуйым шийын кертыда.

Тореш лийын…

Пенсийыште улам, но пашам ыштем. Уныкамым ялыште илыше родо- тукым деке намиен кодаш манын, директор деч тӱлыдымӧ кум кечым канаш пуаш йодынам. Но тудо тореш лийын. Паша шуко улмо дене умылтарен. Закон почеш, мыланем кечым пуышашак огыл ыле мо?

А.Звягина.

Медведево район.

Йодышлан Медведево районысо прокурорын полышкалышыже С.Г.Захарова вашештен:

– РФ Паша кодекс дене келшышын, возыман йодмаш почеш пашам пуышо пашам ыштыше пенсионер-шамычлан пашадарым тӱлыдыман отпускым идалык мучко 14 календарный кечым пуышаш.  Сандене отпускым пуэн огыл гын, те Марий Эл Республикын Кугыжаныш паша инспекцийышкыже вуйшиймаш дене лектын кертыда.

Армийыш каяш жап шуын

Индешымше класс деч вара  кооперативный техникумыш тунемаш пуренам. Вашке мыланем 20 ий темеш, но  шочмо кече марте  техникумым тунем пытарыме нерген дипломым налын ом шукто: мыйым армийыш налшаш улыт. Сандене пален налнем: призыв деч отсрочкым пуэн кертыт мо?

А.Соколов.

Советский район.

Йодышлан Медведево райоынсо прокурорын полышыкалышыже С.Г.Зазарова вашештен:

 – 2017 ий 1 январь гыч «Воинский обязанность да военный службо нерген» федеральный законыш вашталтышым пуртеныт. Тудын дене келшышын, кыдалаш профессиональный образованийым налше студент-влаклан  20 ийым темымекат военный службыш призывлан отсрочко пуалтеш.

Тыгак кугыжаныш аккредитациян образовательный программе-влак почеш кокла кыдалаш образованийым пуышо образовательный организацийлаште очно тунемше-влакынат отсрочкылан  правашт уло. Но кокла профессиональный образованийым налме срокшо федеральный образовательный стандарт дене палемдыме деч утла лийшаш огыл. Сандене тендам армийыш тунем лекмеке гына налшаш улыт.

Колыштын кертыт мо?

Правам аралыше орган-влак телефоным колышт кертыт мо?

Н.Евгеньев.

Параньга посёлко.

Йодышлан Медведево районысо прокурорын алмаштышыже Р.А.Голиков вашештен:

РФ-н «Оперативно-розыскной паша нерген» федеральный законжо дене келышышын, айдемын да гражданинын конституционный праважым шыгыремдыше оперативно-розысконой меропрятий-влакым эртарыме годым тудын дене кылдалтше телефон мутланымашым, кагазеш возымым, электрон да почто йӧн дене колтымо почто, телегораф да моло сообщенийым тӱкаш, тыгак илыме верыш логалаш судын пунчалже почеш гына лиеш. Мутлан, Медведево районышто законодательствым шуктымо амал дене  тергымашым эртарыме годым 169 нарушенийым тӱжваке лукмо. Сандене полициын территориальный пӧлка вуйлатышыжлан 110 йодмашым да 13 представленийым ыштыме. А нунын почеш 56 должностной лицам мут кучаш шогалтыме.

С.Носова ямдылен.

Опубликовать в Мой Мир
Опубликовать в Одноклассники