КУЧЕМ УВЕР

Верым ситарыме йодыш – ик эн пӱсӧ

Правительстве пӧртыштӧ Марий Эл вуйлатыше Александр Евстифеевын Йошкар-Олан мэрже Евгений Маслов дене вашлиймашыже эртен. Тушто рӱдолан доходшым чумырымо да ик эн кӱлешан социальный йодышым, школ ден йочасадым чоҥаш мландым ойырымо йодышым, каҥашеныт.

Мэрын мутшо почеш, 2018 ий оласе бюджетым ончымаште рекорд дене палемдалтын – шке доход ужашыж дене 10 процентлан кушкын.

Вашлиймаште образований темыланат ик эн кугу верым ойыреныт. Йочасадыште да школышто икшыве-шамычлан верым ситарыме йодыш республикыште ик эн пӱсӧ лийын кодеш манын палемден Марий Эл вуйлатыше.

Кодшо арнян Параньга район Эльпанурышто у школым почмо пайрем мероприятий годым Александр Евстифеев йоча-влак чапле условийыште тунемшаш улыт да тидын шотышто олаштат, яллаштат паша ышталтеш манын ойлен. Икмыняр кече гыч рӱдола нергенат мут лектын.

Ты вашлиймаште Марий Эл вуйлатыше образовательный учреждений-влакым чоҥаш мланде участке уло-укем олан мэрже деч рашемден.

Евгений Маслов оласе мландым инвентаризацийым ыштымеке, 8 участкым школым чоҥаш палемдыме нерген увертарен. Кызыт нуным резервыште кучат. Тыгак 9-ше микрорайонышто тунемме тӧнежым нӧлтымӧ паша кая. Тыге пытартыш 30 ийыште Йошкар-Олаште у школ икымше гана республик правительствын полшымыж дене чоҥымо лиеш.

Марий Эл вуйлатыше туштак чоҥен пытарыдыме шуко пачеран пӧртын икмыняр ий дене олан сынжым йомдарымым веле огыл, а социально лӱдыкшӧ объектыш савырнымыжымат ушештарен коден.

«Ты мланде участкыште, 9-ше микрорайонышто, чоҥен пытарыдыме илыме пӧрт тургыжландара. Тудын пӱрымашыже могай», –  йодын Александр Евстифеев.

Школ да кужун чоҥалтше пӧрт ик жапыште сдатлыме лийыт да шуко пачеран илыме пӧртым мучашлыме графикым кызытак пеҥгыдемдыме манын  ӱшандарен ойлен олан мэрже.

Йочасадым чоҥаш 11 мланде участкым ойырымо. «Восточный» ден «Интеграл» микрорайонлаште чоҥымо паша кая. Тушто пеш вашке кок кугу йочасад лийшаш.

Кодшо ийыште республикыште 600 икшывылан 5 йочасадым почмо. Ты ийын январьыште Знаменский посёлкышто 125 веран эше ик йочасад пашам ышташ тӱҥалын. Тиде йодышлан поснак кугу тӱткыш ойыралтеш манын Александр Евстифеев.

Марий Эл Республикым вуйлатышын организаций да аналитике виктемжын уверже негызеш Р.Чепакова ямдылен.

Опубликовать в Одноклассники

Добавить комментарий