КУЛЬТУР ДА ИСКУССТВО ТЕАТР

«Сцене – мемнан сандалыкна, тӱняна»

Волжский районысо Пӧртанур ялын эргыже Павел Ефимов изиж годым хирург, пӱй эмлыше врач, тыгак юрист лияш шонен, а кызыт тудым калык М.Шкетан лӱмеш Марий национальный драме театрын ик эн тале артистше семын пала. Марий Эл Кугыжаныш премийын лауреатше.

 Тӱҥалтыш ошкыл

2005 ийыште Санкт-Петербургысо кугыжаныш театр искусство академийым тунем пытарымеке, П.Ефимов вигак М.Шкетан лӱмеш театрыш пашам ышташ толын. Тунам театрын тӱҥ режиссёржо В.Домрачев «Пысман корем» спектакльым (пьесын авторжо З.Долгова) сценыш лукташ ямдылен. Павел тушто Суксым модын. Тиддеч вара режиссёр Р.Алексеев самырык артистлан «Кронуш» спектакльыште Руш кугыжан мыскарачыжын рольжым ӱшанен. Тиде рольышто актерлан сценыште тӱрлӧ трюкым ыштылаш кӱлын. А Павелын тыгай мастарлыкшылан ӧраш веле кодеш! Тудо Памар кыдалаш школышто тунеммыж годымат спорт дене пеҥгыде кылым кучен, дзюдо секцийыш коштын. Таҥасымашлаштат вий-куатшым терген, сеҥыше радамышкат лектын. А тидыже рвезын капкылжымат, кӧргӧ чытышыжымат пеҥгыдемден.

Ялыште шочын-кушшо кажне еҥ изинекак спортлан шӱман кушкеш, шонем. Теве, мутлан, рвезе-влак, погынен, яраимньын мочол кудалыштынна, телым савар ӱмбач, а кеҥежым вӱдыш шеҥгекла тӧрштылынна, тидлан лӱмын трамплиным ыштена ыле, – шарналта парт коклаште шинчыме пагытшым Павел. – А вузышто тунемме годым ӱстембачын, пӱкен, а вараракше тошкалтыш гыч тӧрштылынна.

Тыгай акробат мастарлыкым Павел да пырля тунемме йолташыже-влаклан Санкт-Петербург гыч доцент Виолетта Баженован шындыме «Маугли» спектакльыштыже ончыкташ йӧн лийын. Репетиций годым самырык артист вуйжо дене камвозын гынат, тудо тыгай йӧн деч шӧрлен огыл.

Шкетанын илышыж дене илаш кӱлеш

Павел Ефимов ынде 13 ий калыкым тӱрлӧ шӧрынан, койыш-шоктышан образ-влак дене куандара, шортара, шонаш тарата. Рольым мастарын модмыжо, образыш келгын пурен моштымыжым шотыш налын, режиссёр-влак тудлан шукыж годым тӱҥ рольым ӱшанат.

Павелым тунемме жапше гычак палем, тунамак шкенжым режиссерын мутшым колыштшо, чылажымат жапыште шуктышо артист семын  ончыктен. Тудо шкенжым ӧрдыж гыч ончен, ужын мошта, санденак рольым огыл, а спектакльымак модеш. Сандене тудлан уло кӧргӧ вийым пыштен модаш кӱлшӧ образым ӱшанен пуалтеш. Тыгай улыт «Ачийжат-авийжатыште» Мачук, «Мӱкш отарыште» Мичи, «Кожла кокласе омышто» Лузган да шуко молат, – рашемда Марий театрын тӱҥ режиссёржо Роман Алексеев.

Кок ий ончыч П.Ефимовым «Эреҥер» спектакльыште тӱҥ геройын — Эвай Пӧтырын — образыштыже ужынна. Тудлан тиде роль моткоч лишыл. «Ачийжат-авийжат…» спектакльыште Мачук деч вара актер Г.Гордеевын «Шкетан» произведенийже почеш тыгаяк лӱман постановкышто Шкетанымак модын.

Лӱмлӧ писатель-классикын спектакльыштыже да эше тудым ушештарыше рольжым модаш – кугу ответственность. Спектакльыште тудын ушыж дене шонен мошташ, тудын илышыж дене илаш кӱлын, – чонжым почеш артист. – А Шкетанын образышкыже пураш манын, илыш-корныжым, произведенийже-влакым, тӱрлӧ писательын возымыжым тӱткын лудаш, нуным умылаш, тудын семын шонен мошташ кӱлын.

Умбакыже 8 февральыште лекше номерыште лудын кертыда.

А.Байкова.

Опубликовать в Одноклассники

Добавить комментарий