СОЦИАЛЬНЫЙ ИЛЫШ

Ида ондалалт…

Илалше еҥ-влак шотышто черетан мошенничестве акт лийме нерген тӱшка увер информаций средстве-влак пытартыш жапыште шагал огыл возат, ойлат да ончыктат. Тидын шумлыкак Калыкым социально обслуживатлыме комплексный рӱдерлаште социальный услугым налше пенсионер ден инвалид-влаклан мошенникын оптышышкыжо логалме деч инструктаж-влакым эртараш тӱҥалыныт.

МВД-н рӱдоласе виктемжын пашаеҥже-влакат, манмыла, «кидыштым кидшерыште кучат» да арам огыл, вет шкетлыкым утларакше илалше граждан ден инвалид-влак шижыт, сандене ӧрдыж гыч толын ойлымылан  куштылгын ӱшанат.

Тиде теме дене кылдалтше лекций сынан мутланымаште мошенничествын тӱрлӧ йӧнжӧ дене палдарат, вет осал шонымашан еҥ-влак кузе гына огыт ондалкале: иктаж погылан оза лийшашлан «чыла черым эмлыше» шояк препаратым, аппаратым ужалат, тӱрлӧ «конкурсыш», «лотерейыш» ушнаш темлат, пуйто азапыш логалше лишыл еҥлан полшашлан оксам йодыт…

Пырля эртарыме мероприятийын цельже – илалше еҥ-влакын тӱткылыкыштым вияҥдаш, мошенничестве лийын кертмым ушештараш, тудын случайже-влак дене палдараш. Вашла мутланымашын тыгай форматше илалше еҥ ден инвалид-шамычым каҥашымашке уша да ондален кертме факт-влакым пырля иктешлаш йӧным ышта.

Тыге, социальный услугым налше кажне еҥ, пачерыш ма пӧртыш пурышо палыдыме еҥын койышым ужын, шкем кузе кучаш кӱлмӧ памятке (тудыжым вашлиймаштак пуэдат) дене пайдаланен мошташ тунемеш, кӱлешак гын, тӱрлӧ организацийын «шокшо линийышкыже» йыҥгыртен кертеш.

Илалше-влак коклаште мошенничестве профилактике шотышто мутланымашым шукерте огыл Йошкар-Оласе «Ветеран» клубышто эртарыме. Тиде пашам 2019 ийыштат шуяш палемдыме.

М.ИВАНОВА.

Опубликовать в Одноклассники

Добавить комментарий