СОЦИАЛЬНЫЙ ИЛЫШ

«Йолташем-влаклан – кугу салам!»

– Зинуш шӱжарем, илет-кутырет? Эметым кондышыч мо? – Волжский районысо Чодыраял Корамас ФАП-ыш пурен шогалше илалше пӧръеҥ омсадӱр гычак йодо.

– Кондышым, Миклай изай. Эрте кабинетыш, давлениетым висем, – порын ӱжӧ фельдшер Зинаида Семёнова. – Давлениет сай, но тазалыкетым садак эскере, темлыме эмым жапыштыже йӱын шого, – мане вара.

– Йӧра… – палем, давлениемже нормо деч кугурак, утыжым тургыжланыме деч тыге лыпландарен ойлет маншыла, чоян шыргыжалын, медик дене келшыш пӧръеҥ. – Ай, тыгай ийготыштыжо ынде ала-мом йӱман дыр?..

78 ияш Михаил Павлович Аникин шочынак Чодыраялыште ила. Йоча пагытше иктаҥашыже-влак семынак эртен: школ, а каникул годым – колхоз паша, яра жапыште – футбол, но армий деч варасе илышыже молын деч мыняр-гынат ойыртемалтын.

– Школышто тунемме годым кеҥеж каникул жапыште колхозын имньыж дене пашам ыштенам. 1959-1962 ийлаште армийыште служитленам. Тиде пагытым нигунамат ом мондо. Тунам мемнам, 500 марий рвезым, Йошкар-Ола гыч Беларусь Республикыш, Гродненский областьысе Дятлово ола воктенысе 01612-ше №-ан военный частьыш, поезд дене наҥгайышт. Тушто казармыште огыл, а телыже-кеҥежше, шошыжо-шыжыже палаткыште, манмыла военно-полевой условийыште, иленна. Ракетчиклан шотлалтынна, тыгодымак стартплощадкым чоҥенна. Лиеш гын, тиде частьыште служитлыше чыла йолташемлан газетда гоч кугу саламым колтем. Ме вет икте-весына дене иза-шольыла иленна, армий деч варажат кужу жап кылым кученна, – самырык жапшым кенета шарналтыш Михаил Павлович. – Газетдан ончычсо тӱҥ редакторжо Василий Матюшев дене поснак келшенна. Тудо тунамак пеш чолга, ответственный, кӧргӧ виян, калык верч тыршыше, мер пашам кӱлынак шуктышо салтак ыле. Арам огыл тыгай кӱкшытыш шуын… Жал, ӱмыржӧ кӱчыкрак ыле, – шыпланыш пенсионер.

Армий гыч толмекыже, М.Аникин угыч колхоз пашаш ушнен, ончыч прицепщиклан тыршен, вара учётчик лийын. Самырык рвезын кожмак чонан улмыжым, техникым йӧратымыжым ужын, 1965 ийыште озанлык вуйлатыше тудлан автошколым тунем лекташ темлен. Тыге Михаил Павлович Йошкар-Оласе автошколыш тунемаш каен да икмыняр жап гыч шочмо колхозышкыжо водитель специальность дене пӧртылын, ГАЗ-51 грузовой автомашинам виктараш тӱҥалын. Вич ий гыч тудлан пасу бригадым вуйлаташ ӱшаненыт, вара тракторист-влакын бригадирышт лийын, а сулен налме канышыш 2000 ийыште плотник бригадын бригадирже должность гыч лектын. 40 ий наре колхоз пашам ыштыме жапыште Михаил Павлович партий горкомын, ялозанлык виктемын чапкагазыштым налын, озанлыкын ойырымо путёвкыж дене турист семын Болгарийыш миен толын, Пашан ветеранже лийын.

–  Калыклан, поснак палыдыме еҥлан тидым ойлымемлан пелашем сыра гынат, каласыде ом керт: Пезмучаш ӱдыр Раисия Николаевам чот йӧратен марлан налынам, кызытат тугакак йӧратем да пагалем, – пелашыжын мом-мом налаш кӱштымыжым шарналтен, шыман шыргыжале Михаил Павлович. – Ме тудын дене ныл йочам ончен куштенна. Люда ӱдырна шке районысо Азъялыште ешыж дене ила, Аля – Йошкар-Олаште, Руслан ден Володя эргына-влак – Волжскышто. Лу уныкана, уныканан ик уныкаже улыт! Юмылан тау, начарын она иле: пенсий оксана ситымыла чучеш, кугурак пашам икшывына, уныкана-шамыч толын ыштен кодат. А ме вара пелашем дене тамлын кочкына да телевизорым веле ончен шинчена, поснак «Жар птица» каналым йӧратена.

Михаил Павлович эмым нале, рюкзакысе изи кӱсеныш чаткан пыштыш, нумалтышыжым тупышкыжо сакыш да, шокшын чеверласен, омса велкыла ошкыльо.

– Пелашем эше кевытыш пураш кӱштыш, – тендан дене шогылташ жапем уке маншыла ешарыш.

Омса урем веч петырныш. А мый шканемат вучыдымын шоналтышым: «Могай оҥай да тыматле пӧръеҥ. ФАП-ыш икмыняр минутлан веле пурыш гынат, шкенжым ӱшанле йолташ, уста пашаеҥ, йӧратыше пелаш, сай ача, поро коча, ойым колыштшо пациент семын ончыктыш… Тыгай пелен илашыжат ласка, очыни».

М.ИВАНОВА.

Авторын фотожо.

Опубликовать в Одноклассники

Добавить комментарий