КУЧЕМ УВЕР

Вияҥашыже полшаш ойым пидыныт

5 декабрьыште «субъектын шагатше» дене келшышын, Федераций Советын

заседанийыштыже Марий Элын социально-экономически вияҥмыжым каҥашеныт.

Федераций Совет председатель Валентина Матвиенко шке выступленийыштыже ушештарен: 82 ий ончыч лач тиде кечын Марий автономный областьым Республикыш савырыме.

– Тендан кундемда моткочак поян историян да ойыртемалтше йӱлан. Марий Элын визитный картычкыже-влак кокла гыч иктыже калык-влак коклаште тыматле кылым арален кодымаш да вияҥдымаш эре лийын, – каласен тудо.

Палемдымыж почеш, республик кызыт элыштына ятыр показатель дене ончылно кая. Промышленный производство вияҥме дене ӱмаште Марий Эл Юл кундем федеральный округышто ныл лидер-влак коклашке да Российыште кумло лидер коклашке пурен. Аграрный секторышто округышто икымше да пӱтынь Россий мучко нылымше лийын.

– Куанен палемдынем: шукертсе огыл жап гыч марий кочкыш Российысе рынкым веле огыл «сеҥен налеш», тыгак йот элласе производиетль-влакланат кугу конкуренцийым ышта, – регионысо бренд-влакым кӱлын вияҥдыме нерген ойлышыжла, каласен  Валентина  Матвиенко.

Тудо республик вуйлатыше-влакын регионышто кӱкшӧ технологийым вияҥдышашлан кугу тӱткышым ойырымыштымат палемден.

– Кугытшо дене кугуат огыл Марий Эл Республик виян АйТи-индустрийже дене кумдан чапланен. Программный обеспечений, компьютер модышым да мобильный приложений-влакым ямдылымаште тыршыше тыште шагал огыл компаний сайын пашам ышта, – каласен СФ вуйлатыше.

Тыгодым тудо улшо нелылык-влак нергенат ушештарен коден:

– Элын оборонно-промышленный комплексшын йодмашыж-влак почеш пашам ыштыше предприятий-влакын нелылыкыштымат ужына. Нине предприятийлаште гражданский продукцийым утларак ямдылаш тӱҥалме нелылык-влакым сеҥаш полшен кертеш, шонем.

Валентина Матвиенко регионышто пытартыш кум ий жапыште демографий сӱрет уда велыш вашталтме нергенат каласен. Тидыже йоча шочмо чот шагаллеммылан да калыкын республик гыч кайымыж дене кылдалтын. Тыгай сӱретын тӱҥ амалжылан тудо Марий Элыште алят ӱлыкшӧ илыш кӱкшыт улмым шотла.

– Пытартыш ийлаште федеральный рӱдерат республиклан полышым пуымо шотышто кӱлеш тӱткышым ойырен огыл. Поснак – корно-транспорт инфраструктур йодыш-влаклан. Регионын шкенжын авиационный сообщенийже уке. Тиде – шот огыл. Тыгак республик вуйлатыше-влакын посна тӱткышым окса дене кылдалтше йодыш-влаклан ойырыман. Молан манаш гын парым тугак эше изи огыл.

В.Матвиенко Марий Эл Республикым ыштымылан кок ий гыч 100 ий темме да тиде  лӱмгечым палемдышашыж нерген ушештарен, палемдыме проект-влакым илышыш пурташ регионлан полшаш кӱлмым кӱлешлан шотлен каласен.  

Александр Евстифеев палдарен: регионын правительствыже республикым 2030 ий марте социально-экономически вияҥдыме шотышто стратегийым да тудым илышыш муртымо планым ямдылен.  

– Тушто тӱҥлан инфраструктурым, регионысо инвестиций да инноваций системым вияҥдымым шотлымо, – каласен тудо.

Марий Эл Республикын Кугыжаныш Погын председательже Юрий Минаков регионын законодательный кучемжын пашаже марий калыкын национальный ойыртемжым, йӱлажым шотыш налын шукталтме нерген ойлен. Тыгодымак палемден: законодатель-влакын эн кугу тӱткышышт экономикылан да инвестиций паша дене кылдалтше йодыш-влаклан ойыралтеш.

Федераций Советын Федеративный устройство, региональный политике, верысе самоуправлений да Йӱдвелын пашаже шотышто комитет председатель Олег Мельниченко Федераций Советын «Марий Эл Республикын социально-экономически вияҥашыже  кугыжаныш полыш нерген» постановленийын проектше дене палымым ыштен. Тиде документым Федераций Советыште Марий Элын кечыже-влак дене келшышын комитет-влакын эртыше заседанийыштын иктешлымашыштым шотыш налын ямдылалтын. Сенатор-шамыч проектым сайлан шотленыт.

Тиде мероприятий жапыштак Марий Эл нерген каласкалыше видеороликым онченыт.

Л.Камалетдинова.

Опубликовать в Одноклассники

Добавить комментарий