УВЕР ЙОГЫН

Пенсий фонд шижтара: Ынде вес семын ондалат

Россий Пенсий фондын Марий Элысе пӧлкаже шижтара: интернет-мошеник-влак, кугу суммо дене сымыстарен, калык деч оксам ондален налме у йӧным шонен луктыныт. 

Пытартыш жапыште Интернетысе икмыняр сайт СНИЛС-ын номерже да паспортысо данный-влак полшымо дене «частный страховой фондлаште кийыше окса выплатын уло-укежым» тергаш йодыт.

Калык деч оксам ондален налме йӧн путырак проста:

• мошеникын оптышышкыжо логалше еҥ икымше этапыште СНИЛС-ыжын номержым да паспортшын данныйже-влакым воза. Тылеч вара сайт пуйто налаш лийме суммым ончыкта. Шукыж годым тиде – 100 тӱжем теҥге коклаште;
• тылеч вара сайт палемдыме частный страховой фондлашке пурышашлан оксам тӱлаш темла, пуйто тыге веле клиентын счётышкыжо средствам вигак кусараш лиеш;
• умбакыже – мошенник-шамычын классический манме схемышт: взносым тӱлышӧ айдеме нимогай оксам ок нал.

Сайтыште тиде йӧн дене «оксам налше-влакын» отзывыштымат лудаш лиеш, но нине еҥ шонен лукмо улыт. Оҥайлан тидымат ушештараш уто огыл: шонен мумо (шояк) данныйым пуымо годымат оксам налаш лийме вашмут толеш.

Йолташ-влак, нине сайтлан ида ӱшане, шке персональный данныйдамат кӧлан шуын, тудлан ида пу, лийме семын секретыште кучыза.

А пенсий выплате шотышто чыла информацийым Пенсий фондын сайтыштыже Личный кабинет гоч рашемдаш лиеш. Кокытеланымаш лекме годым республикысе «шокшо линийыш» 8-800-100-1680 номеран телефон дене йыҥгырташ але https://vk.com/pfr mariel. электрон адресыш возаш йӧн уло.

М.ИВАНОВА.

Опубликовать в Мой Мир
Опубликовать в Одноклассники