ТОШКАЛТЫШ

«Чонем порырак лийын»

Пермь кундем Суксун район Эҥертӱҥ (Иванково) ялын эргыже Александр ПРОКОПЬЕВ дене тений июльышто Марий самырык тукым слётышто палыме лийынна. Тудо тӱмырым мастарын пералтен колтымыж дене сымыстарыш. Рвезе Пермьыште Н.Славянов лӱмеш колледжыште икымше курсышто тунемеш, машиностроенийын технологшо специальностьым налаш ямдылалтеш.

– Саша, тӱмырым тыге мастарын пералтымет годым йол кушташ шкеак ӱжеш. Кушто тыге шокташ тунемынат?

– Изинек семлан, тӱвыралан шӱман улам. Авам пашаш кайымыж годым мылам марий куштымаш, муро дене видеом чӱктен кода ыле. Тыге, концертым ончен, мураш, кушташ кумылаҥынам. Гармонь, шиялтыш, тӱмыр дене шокташ шкеак тунемынам.

– Тынар семӱзгарын мастарже улат гын, очыни иктаж ансамбльыш коштат.

– Школышто тунеммем годымак ялла мучко концертла дене коштынна. Кызыт Пермьыште Марий тӱвыра рӱдерыш коштам, тусо ансамбльыште шоктем.

– Марий Элыште слёт деч ончыч лияш логалын?

– Авам Кужэҥер район Шойдӱҥ ял гыч, сандене шочмо кундемыштыже ятыр гана лийынам, кеҥежым коча-ковам дене эртаренам. А теве Марий самырык тукым слётыш икымше гана толынам. Мыланем тудо ятыр пайдам конден, поснак йӱла, йылме темылан пӧлеклалтше лекций-влак оҥай лийыныт.  Лач тушто марла мутланаш сайрак тунемынам, йылмем лывыргырак лийын, йолташ-влакым муынам. Ӱшанем, нунын дене кылна пеҥгыде лиеш. Слётыш толаш таратымыжлан Александр Николинлан тауштем. Тудо шкеже тушто ынде кумшо гана лийын.

– Тыйын шонымаште, тыгай мероприятий йылмынам, тӱвыранам арален кодаш полша?

– Лач тыгай шотан мероприятийланак кӧра йылмына таче ила, вияҥеш. Марий самырык тукым слётым эртарыше-влак моткоч кӱлешан пашам ыштат. Вес кундемлаште илыше марий самырык ӱдыр-рвезе-влак, слётыш чумырген, калыкна нерген шукырак пален налыт, варажым тушто мом ужмыштым, колмыштым йолташыштлан каласкалат. Вес ийын нунат тушко ушнат.

– Спорт денат кылым кучет?

– Тидлан жапем уке, а ончыч туризмлан шӱман лийынам. Ятыр гана турист слётышто лияш логалын. Кызыт храмыште служитлем. Алтарник улам, литургийым лудам. Юмо дене утларак лишкырак улмемлан кӧра чонемлан куштылгырак лийын, илышым вес шинча дене ончалынам, еҥ-влак дене порырак лийынам. 

Лидия ШАБДАРОВА.

М.Скобелевын фотожо.

 

Опубликовать в Одноклассники

Добавить комментарий