УВЕР ЙОГЫН

Порысым пӧртылташ жап эре лийшаш» — тыгай шонымаш дене ила мер да кугыжаныш деятель, философ Николай Никандрович Гаврилов. Тудлан таче  – 70 ий.

Александр Михайлов Татарстанысе Агрыз район Кадрек ял шотан илемым вуйлата.

3 февральыште калык лӱмым нумалше мурышо да куштышо «Элнет» ансамбль Татарстанысе Памашэҥер ялыш концерт дене миен.  Нуно ты ялын калыкшым клубым торжественно почмо дене саламленыт. Клубым ӱмаште ноябрьыште почыныт, но тунам ансамбльыш коштшо-шамыч  пошкудыштым саламлаш толын кертын огытыл. Артист-влак Озаҥ олаште эртыше «Татарстан —  мемнан пӧртна» фестивальыште лийыныт. Тушто ансамбль лауреат лӱмым налын.

Башкортостанысе Мишкан селасе 1-ше №-ан лицейлан драматург Флорид Буляковын лӱмжым пуэныт. Флорид Минемуллинович Кугу Шады ялыште шочын, Российысе литератур да искусствышто кугыжаныш ден Башкортостан Республикын Салават Юлаев лӱмеш  кугыжаныш премий-влакын лауреатше, Башкортостанысе тӱвыран сулло пашаеҥже, Башкортостан  Республикын калык писательже, Мишкан районын почетан гражданинже.

Татарстанысе Менделеевский район Алабога олаште «Идалыкын ӱдырамашыже. Идалыкын пӧръеҥже: ӱдырамаш шинча дене» конкурс эртен. «Ӱдырамаш – ава» номинацийыште Памашэҥер ялын чолга енже Лидия Никитина сеҥышыш лектын. Тудо Казаньыште районын чапшым аралаш тӱҥалеш.

Удмуртий Республикысе Келшымаш пӧртыштӧ туныктышо, фронтовик, мер пашаеҥ Иван Ямаковын шочмыжлан  95 ияш лӱмгечыжлан пӧлеклалтше Марий кас эртен. Тудо 1922 ий 20 январь Удмуртий Республикыште Алнаш район Маскаялыште кресаньык ешеш шочын.

21 февраль — Шочмо йылмын кечыже. Ты кечын шукын йылмым аралыме нерген мутым луктыт.

Татарстанысе Менделеевск олаште эртыше В.Гизатуллина лӱмеш «Соловушка-2017» районысо вокал-хор йоча конкурсышто Элнет кундемын ӱдыржӧ Вероника Васильева II степенян лауреатын дипломжо дене палемдалтын.  Тудо «Соло» номинацийыште ойыртемалтын.

«Удмурт дунне» газетын коллективше «Российын шӧртньӧ пераж» дене палемдалтын. Редакций ты конкурсышто «Россий журналистикын шӧртньӧ полкыжо» номинацийыште ойыртемалтын. Ты кӱкшӧ наградым газетын 100 ияш лӱмгечыж вашеш савыктыме  икымше удмурт энциклопедийлан налыныт.

Сургутышто «Тарелкаште – кече» ӱярня пайрем эртен.  Тудо «Сургут – мемнан пӧртна» проект кышкарыште лийын. Тушто мастарлыкым ятыр коллектив ончыктен.  Тусо  «Марий ушем» мер организацият Ӱярням ужатымашке ушнен.