Йошкар-Олаште 20 октябрьыште марий подкогыльлан памятникым почыныт.
Тыгай шонымашым «Теплая речка» трактирын озаже-влак илышыш шыҥдараш пижыныт. Памятникым верысе апшат-влак ямдыленыт. Тушто подкогылян тарлека ончыкталтын. Нелытше 100 килограмм нарыш, а лопктышто ик метрат пелыш шуэш. Организатор-влак ты шарныктышым трактирыште ыштыме 100001 подкогыллан пӧлекленыт да тудо могай лийшаш нерген кужу жап шоненыт.
Тиде событийжым трактирын кум ияш лӱмгечыжлан келыштареныт. Ты кечын тушко мийыше-влакым кугу пайрем вучен. Тамле кочкыш дене пырля кумылым нӧлтышӧ программе, тӱрлӧ конкурс, куштымаш лийыныт.
Мутат уке, уна-влакым сийлыме эн тӱҥ кочкышыжо подкогыльо лийын. Организатор-влак пайремлан эн кугу подкогыльым, тӱнямбал рекордым ышташ сӧреныт. Тудын нелытше 19 килограммыш, кугытшо 70 сантиметрыш шуын. Кӧргыжым пареҥге да торык дене ямдыленыт. Марий манмыла, «тувыртыш когыльым» ыштеныт. Но тудым шолтен огытыл, а кӱктен луктыныт.
Тӱнямбал рекорд шотыштыжо, подкогыльым войзен налыныт да фотожым конкурсыш колтеныт. Тыштак каласен кодыман, тулеч ончыч трактирыштак эн кӱкшӧ марий команмелна кышылым ыштыме дене рекордым пеҥгыдемденыт ыле. Ынде тувыртыш когыльо шотышто сай уверым вучаш тӱҥалына, коеш.
С.Носова.
