Марий Эл Республик вуйлатыше Александр Евстифеев паша визит дене Москваш каен. Тушто тудо Марий Эл Республикылан 100 ий теммым палемдыме пайремым эртарыме шотышто оргкомитетын заседанийыштыже участвоватлен. Вашлиймашым Россий Федераций Правительстве Председательын алмаштышыже Виталий Мутко эртарен. Лач тудым августышто федеральный кӱкшытан орккомитетым вуйлаташ шогалтеныт.
Республикын 100 ияш юбилейже 2020 ийыште палемдалтеш. Тудым эртарыме шотышто 2013 ий 9 февральыште Россий Президентын указшат лектын. Республикыште оргкомитет ышталтын. Тушко законодательный ден исполнительный кучем, федральный кучемын территориальный органже-влакын, массовый информаций средствылан, научный сообществын еҥышт пуреныт. Тӱҥ мероприятий-влакым эртарыме республиканский план ышталтын. Тудо ныл ужаш гыч шога да 89 мероприятийым уша. Нылле кудытшылан федеральный бюджет гычат окса ойыралтшаш.
Кызыт республикысе кучемын вийже дене юбилейым пайремлымашке ушымо тӱвыра да спорт объект-влакым уэмден олмыктымо паша кая. Туге гынат ятыр йодышыжым федеральный рӱдерын полшымыж деч посна решатлен огына керт.
Каласен кодыман, мероприятий план дене келшышын, республикын 100 ияш лӱмгечыжым палемдыме амал денак тений гыч тӱрлӧ ончер, фестиваль, просветительский да савыктыме, тыгак тӱвыра поянлык объект-влак шотышто уэмден олмыктымо паша эртаралташ тӱҥалыныт.
Пайрем мероприятий циклым «Театральный Йошкар-Ола» фестиваль почын. Кызыт М.Шкетан лӱмеш марий национальный драме да Г.Константинов лӱмеш руш академический театрлаште «Майатул» финн-угор калык театр-влакын фестивальыштлан ямдылалтыт. Тений тудо «Финн-угор драматургий: комедий жанр» маналтеш. Тыгак «Келшымаш кӱвар» руш да лишыл йот эл-влакын театр фестивальыштлан ямдылалтыт.
Э.Сапаев лӱмеш опер да балет театр Сочисе Телымсе театрын площадкыштыже гастроль годым шке мастарлыкшым ончыктен, «Сочи олаште кеҥежымсе балет сезон» ӧрыктарыше проект дене куандарен.
Кызыт Йошкар-Олаште Историй да археологий тоштерым почаш ямдылалтме паша кая. Тудын экспозиций заллажым 4 ноябрьыште, Марий Элын шочмо кечынже, почаш палемдыме.
Республикысе Сымыктыш тоштерат тӱрлӧ ончер проект дене пашам ышта. Теве теҥгече гына Йошкар-Олаште Кугыжаныш руш тоштерын фондшо гыч кондымо отечественный живописьын кум курымжо дене палдарыше «Курым гыч курымыш. Руш тоштерын поянлыкше» ончер почылтын. Тыге регионышто илыше-влак классический руш искусствын эн сай образецше-влак дене палыме лийын кертыт.
Тыгак республикыште «Информационный технологий да марий йылме» просветительский проект илышыш шыҥдаралташ тӱҥалын. Тудын лектышыже семын руш йылме дене палемдыме грамматический палан сайт лийшаш. Тыгак 2020 ийыште марий-руш да руш-марий мутер-влак, «Марий Эл Республикысе калык-влакын тӱвырашт да историйышт» сборник, «Марий Элын, акрет гыч тӱҥалын, кызыт марте историйже » шуко томан савыктыш лектын шушаш улыт.
Тений гына Марий Республикын 100 ияш лӱмгечыжым палемдаш ямдылалтме амал дене ныл тӱвыра поянлык объектыште — музыкальный училищыште, М.Шктетан лӱмеш марий национальный драме театрыште, С.Г.Чавайн лӱмеш библиотекыште, Юринысе Шереметьев замкыште — уэмден олмыктымо паша кая.
Марий Эл Республик вуйлатышын организаций да аналитике виктемыжын уверже негызеш С.Носова ямдылен.
