СПОРТ

Чемпион – «РМТ», а икымше верыште кайыше «Знамя»?

Кумыл уло, йӧн уке

Футбол дене Марий Элын чемпионатше мучашке лишемеш. Тиде тургымышто сай результатым пуышо, сайын модшо команде семын Параньга районысо Ондропсола ял гыч «Знамя» командым палемдыман. Пытартыш марте, манаш лиеш, тудо турнир таблицыште ончыл верыште лийын. Но 30 сентябрьыште эртыше матч эн талыжым ойырен. Икымше верыш Йошкар-Оласе «РМТ» команде лектын.

Лишыл жапыште газетнан лаштыклаштыже «Знамя» команде, тудын участникше-влак нерген лишкырак палдарена. Командыште опытан, тыгак самырык-шамычат улыт. Таче лудшына-влакым ятыр ий футболла модшо, кызытат верысе командын чапшым аралыше Иван Гусев дене палдарена.

Шочынжо Иван Владимирович (1981 ий) ты кундем гычак. Кызыт Матародо школышто физкультурым туныкта. Тренер-преподаватель сомылым шукта, самырык тукымым футболлан кумылаҥда. Жапше годым спортын ты видшылан ӱдыр-влакымат шӱмаҥден. Тудын воспитанникше-влак ятыр ий «Мариэлочка» командын чапшым араленыт. Мутлан, Лидия Щеклеина лу ий утла Марий Элын ӱдырамаш командыштыже капка орол лийын. «Вратарьын сайын модмыжым, тудын тӱткылыкшым икмыняр футболистым алмаштыме семын палемдаш лиеш. Элнан первенствыштыжат модынна, призёр радамышкат лектынна. Тидыже тренерна Евгений Петровын моштен тренировкым эртарымыжлан кєра манам гынат, йоҥылыш ом лий. Тӱҥалтышым, мутат уке, шочмо кундемыштем ыштыме. Иван Гусевын кумылаҥдымыжлан тау», – манеш Лидия Макарова (Щеклеина).

И.Гусевын вес воспитанницыже – Рената Соловьёва (Горинова).

«Мариэлочка» ӱдырамаш футбол командыште Р.Горинова ик эн тале участнице семын аклалтеш. Ӱдыр-влак опытым погеныт, мастарлыкым ешареныт, технически да физически кушкыныт. Икымше класс гычак футболла модеш. Тӱҥалтыште рвезе-влак коклаште куржталын гын, шымше класс гыч лийже манынак тренер И.Гусевын туныктымыж почеш заниматлен.

Индешымше классыште тунеммыж годым Ренатан ӱдыр-влак командым чумыраш шонымашыже шочын. Лач тудо жапыште районышто мини-футбол дене ӱдыр команда-шамыч коклаште турнирым увертареныт улмаш. Командыште кандаш ӱдыр тыршен модын, моло-влак деч нуно палынак ойыртемалтыныт. Варажым районышто сборныйым чумыреныт. Рената тушто ик тале участница лийын. Ты командат районысо вич команда коклаште эреак ончыко лектын.

Икымше тренерже И.Гусев нерген поро шомакым гына ойла.

– «Знамя» командын сай результатыш шумыжым участник-влакын футболым чот йӧратымышт дене кылдыман. Мыят изиэм годсек футболла модынам. Ончыч школын, вара колхозын «Знамя» командыжын чапшым араленам, – ойла Иван Владимирович. – 1994 ийыште «Шӱштӧ мече» турнирыште республикыште кумшо верым налынна. Тидыже ончыкшым эшеат сайын модаш пеш сай шӱкалтыш лийын. Школ деч вара Оршанке колледжыште тунемынам, вара армий радамыште лийынам. Шке порысым шуктен толмеке, 2005 ий гыч «Знамя» команде дене республикыште икымше лигыште модынам. Сай результатым ончыктен, кӱшыл лигыш кусненна. Тыге таче кече мартеат ты командын чапшым аралем. Куандара: вич воспитанникем ты командыште модеш. Тыршымаш арам ок йом, шонем. Икте-весым умылена. Уло кумылын, чоным пыштен, модына. Икте кумылым волта: икте-весе дене чумырген, кӱлеш семын тренировкым ышташ йӧн уке. Тиде садак командым изиш лушкыдемда. Чылан тӱрлӧ вере пашам ыштат, чылаштын ешышт уло. Мутлан, «РМТ» футбол командым налаш. Тушто икмынярышт профессионал-влак улыт, манаш лиеш, ончычсо «Спартак» командыште модшо-влак участвоватлат. Тренерыштат  – виян специалист. Нуно, икте-весышт дене вашлийын, кеч-могай жапыште тренировкым ыштен кертыт, йӧнышт шукырак. Сандене тале команде семынак палемдыме шуэш.

Модмаш шукыштым тургыжландарен

22 сентябрьыште Йошкар-Оласе «Арена» манежыште «Знамя» ден «Тарханово» команде-влак вашлийыныт. Ончышо-влакат ятырак лийыныт ыле, лўмынак ял гыч толыныт. Матч пеш шокшын эртыш. Пасушто «Тарханово» команде велым торжалык шижалте. Кок командыжат талын модо. Когыньыштынат голым пуртышаш тат ятырак ыле. Но тидын дене участник-влак пайдаланен ышт керт. Модмаш ничья (0:0) дене иктешлалте.

30 сентябрьыште «Знамя» команде Йошкар-оласе «Дружба» стадионышто «РМТ» футбол клуб дене вашлие. Игече, вучыдымын, йўкшемден. Садланак дыр ончаш толшо-влак шагалрак лийыныт. Но Параньга районысо Ондропсола ял гыч шке командышт верч тургыжланаш адакат лӱмын погынен толыныт. Матч тӱҥалтыште «Знамя» команде гыч Артём Соловьёв соперникын капкашкыже икымше голым пуртыш. Шукат ыш эрте, «РМТ» команде счётым тєремдыш. Вара эше капкашке мечым пуртышт. Тыге йошкаролинец-шамыч мастарын модмыштым эше ик гана пеҥгыдемдышт. Икымше тайм 2:1 счёт дене мучашлалте (РМТ ончылно), но таблошто ала-молан 2:0 счёт ончыкталтын. Тидын шотышто болельщик-влакын кумылышт изиш волен. Кокымшо таймыште «РМТ» команде эше ик голым пуртыш. Матч 3:1 счёт дене мучашлалте. Тыге РМТ команде чемпион лие. Икте куандара: Ондропсоласе футболист-влак садак призёр радамыште лийыт.

7 октябрьыште Параньга районысо Ондропсола ялыште «Волжск» футбол клуб дене верысе «Знамя» вашлийыт, кокымшо вер верч модаш тӱҥалыт.

 

Е.Эшкинина.

Опубликовать в Одноклассники

Добавить комментарий