Куржам мый, куржам… (Т.Петухов)
10 октябрьыште сутка мучко куржталме дене тӱнямбал классан спорт мастер Римма Пальцева 70 ияш юбилейжым палемден.
Чолга ӱдырамашым, тале спортсменым, поро ава-ковам ятыр йолташыже саламлен. Эн кугу, оҥай, шарнымашан да шкешотан мероприятийже марий ӱдырамаш-влакын «Саскавий» ушемжын «Римм-прима» дене пырля куржталына» тазалык акцийже лийын.
Какшан сер воктеке ятыр спортсмен, таза илыш-йӱлам кучышо-влак, Римма Алексеевнам пагалыше, пырля стартыш лекше йолташыже-влак чумыргеныт. Нунын коклаште ончычсо физический культур, спорт да туризм министр В.Чумаков, куштылго атлетике дене РФ-ын Марий Элысе пӧлкажым вуйлатыше А.Гребнев, икымше тренерже Н.Кутузов, куржталаш йӧратыше-влакын «Айвика» клубын вуйлатышыже И.Земцов, ты клубын еҥже-влак, МарГУ-што кумшо курсышто тунемше (вуйлатышышт О.Устыменко), аграрный колледжын студентше-влак (вуйлатышышт Г.Волков), «Марий Эл», «Ямде лий», «Кугарня» газет редакцийын пашаеҥышт лийыныт. Чыланат тазалык корныш лектыныт, Какшан сер йыр куржтал савырненыт.
Мурызо-влак Зоя Берникован, О.Якимова ден А.Мамаевын, С.Яндукован, «Чон оҥгыр» фольклор ансамбльын, Татарстан Республикын сулло артистше землякна Н.Коноваловын йоҥгалтарыме мурышт пайрем кумылым пуртен. Тыгак тӱнямбалне чапланыше спортсменкын чонжым Марий Элысе лӱмлӧ поэт-влакын почеламут-пӧлекышт вучыдымо да шерге лийын.
Спорт мероприятийыште тўнямбал чемпионко лўмеш ятыр поро мут йоҥген. Вет ты тыматле койыш-шоктышан, тыгодым тале ўдырамаш шукыштлан сай пример лийын кодеш.
Пайремым эртарыше организатор, поснак «Саскавий» ӱдырамаш ушем вуйлатыше Л.Кошкиналан кугу таум каласена.
***
Южгунам уремыш лектын,
Куржын колтымо шуэш.
Ныжылгын, шыман да эплын,
Прима-Риммаланак йӧршеш.
Но кушеч тыгае кумыл?..
Ноенам мо? Каненам?..
Эсенейсола ял ӱдыр,
Йоча жапыш тайнена?
Чарайолын, йӱр йымалне,
Шаршудан уремыштет,
Куржына куэр аланыш,
Чошена, чоп-чоп ыштен.
Олык, ото, нур-пасушто,
Тӧрштыл-воштыл модмыла,
Илена Пӱртӱс асушто,
Емыж-саска-модыла.
Тылзе деч велеш ший кумыр,
Шӧртньым кече кучыкта.
Чап аралтыш-куржмо кумыл,
Куржын, шӱм-чон йывырта.
Зоя Дудина.
Санкт-Петербург. 11 октябрь 2018
Шкем сеҥыме марафон
Р.А.Пальцевалан
Таче тудо Чавайнын бульварыште,
Какшан серыште куржын эрта,
А эрлаже иктаж Зинзибарыште
куржмо корным чолган такырта.
Куржын эртыш Европым, Америкым, –
Эше шуко эл уло почаш.
Ончыкталын марийын чон эрыкым,
Мланде йыр савырнен лу пачаш.
Изинекак пашалан налме койышым
Куржмо корныш пышташ тудо рат.
А почешыже, рӱж кырен совыштым,
«Римма-Прима!» – аклен кычкырат.
Ушнымеке кужу ӱмыр корнышко,
Кӧргӧ вийна шагал – чаманем…
Шкем сеҥаш илышнан марафонышто
Тудын деч тунемаш мый темлем.
…Вашлиям адакат Какшан серыште,
Савем вуйым да корным пуэм…
Жап эртен, толкынан тиде верыште
Тудлан почмо чапкӱым ужнем!
Геннадий ОЯР.
13.10.18.
Куржмо кумыл
Ме куржын-куржын толна илыш шыжыш,
Да шӧртньым йол йымак ынде кышкат…
Но кече мыланна тетла тунар ок шыргыж,
А финиш деке ыжна шу лишкат.
Ме куржына эше, омеш ма, але чынак,
Кєланже шымле меҥге – вер гыч кынелмаш.
Куржмаште шижынна ме куржмо чыным –
Лекмеке корныш, огеш лий чарнаш!
Ме куржына йӧратымаш деч шылме семын –
Шеҥгеке ончыде, шинчам кумен.
Вара, колмеке сеҥымаш чап-семым,
Мом йомдаренна куржмо годым – чаманен.
Ме куржынна. Пиал ден таҥасенна:
Поктен шуэш? Эртен пиалым каена?
Но иктым лачак иктым ме паленна:
Вара яндар памаш вӱд деке тайнена.
Ах, куржмо кумыл! Марафон гай илыш!
Алят мый писе, шулдыран улам:
Ужам: воктечынРимма ончык чымыш –
Почешыже ончен, кодам тулаҥ.
Вет ошкыл-куржын толна сылне шыжыш!
Ах, йолйымалне шӧртньыжӧ мыняр!
Тек кече мыланна тунар ок шыргыж,
Шке, шыргыжын, волгалтена тӱням!
Альбертина Иванова. 13 октябрь 2018 ий.
Шыже пагыт
Лышташ нарынче-чеверын
Йырым-йыр сӧрастара,
Кечыйол сӱретче лийын,
Мардеж пуалын шаяра.
Ой, могае! Могай сае!
Ончалат – шинчат йыма,
Моткочат чот поро пале –
шӧртньӧ шыже озалана.
Мер Юмынам ме йодына –
Лиеш тек тынысле Оза:
Тек тӱзлана сурт-печына,
Ушан кушкеш тек йочана.
Садер пасу да чодыра –
Тичмаш поянлыкым сӧра,
Рвезе тукым сай сӱаным
Тарваташ вашка лач шыжым.
Мардан Рая. 2018
Е.Эшкинина.
