УВЕР ЙОГЫН

Кыл вияҥеш да кушкеш

«Шӧртньӧ шыже» агропромышленный выставкыште Марий Эл вуйлатыше А.Евстифеев ден Башкортостан правительствын премьер-министрже Р.Марданов ялозанлыкыште кооперацийым да экспортым вияҥдыме шотышто ойпидышеш кидпалым пыштеныт.

Кок регион коклаште пеҥгыдемдыме документ дене келшышын, Башкортостан ден Марий Элысе  ялозанлык предриятий-шамычлан икте-весе коклаште ужалыме да экономике кылым кугемдаш, аралаш субъектласе кучем-влак йӧным ышташ тӱҥалыт. Тыгак паша опыт, методике разработко дене пайлалтыт, ялозанлыкыште экспорт да коопераций дене кылдалтше механизмым саемдаш тыршат.

– Юл кундем федеральный округысо кок республик шукертак келшен да пырля пашам ыштен илат. Марий Эл деч вес кундемыште илыше марий-влакым ончалаш гын, Башкортостаныште нуно эн шукын улыт, санденак ме поро пошкудо улына. А  кызыт пеҥгыдемдыме ойпидыш экономический сынан. Тудо вольыкым ончен куштымо дене кылдалтын. Поснак каза вуй чотым шукемдыме дене.Тачысе пагытыште тиде пеш кӱлешан, вет каза шӧр гыч ыштен лукмо продукт экологий могырым яндар, калыкат тудым кумылан налеш. Мутлан, йоча кочкышым, сырым. Специалистна-влак улыт, ме опытна, мом палымына нерген икте-весылан каласкалаш тӱҥалына. Ӱшанем, регион-влак кокласе паша тӱвыргӧ лектышан, кужу ӱмыран лиеш, – манын Александр Евстифеев.

Башкортостанын премьер-министрже Рустэм Марданов пеҥгыдемдыме ойпидыш кок национальный республик кокласе кылым вияҥдаш, шараш йӧным ыштышаш манын палемден.

– Ӱшанена, кылна утларак кушкеш, поснак аграрно-промышленный комплексым вияҥдымаште. Тыгак казам ончен куштымаште  сай лектыш лиеш манын шонем, вет  республикнан ялозанлык производство программыштына ме лач тидлан кугу верым ойырена. Тыгак вольыкым ончымыште да пакчасаскам ончен куштымаште ваш келшен пашам ышташ тӱҥалына манын ӱшанем, –  каласен Р.Марданов.

«Шӧртньӧ шыже»  ончерыште Марий Эл гыч ик эн виян да ончыл предприятий-влак шке продукцийышт дене палдарат. Сай качестван кочкышым ямдылыме производство конкурсышто «Акашевский» чыве фабрике, Йошкар-Оласе ден «Звениговский» шыл комбинат-влак, «Чай Руси» ден «Яндар» ООО-шамыч, потребитель коопераций организаций-влак участвоватлат.

«Племенной животноводствышто сай кӱкшытым ончыктымылан» конкурсыш  «Лукоз» ООО Зааненский  каза урлык марий типшым аклаш луктеш.

«Ялозанлык кумдыкым вияҥдымаште сай лектышым ончыктымылан» конкурсышто  шке пашаж дене Медведево район палдара, а «Ялозанлыкышке инновацийым сайын пуртымылан» конкурсышто «Шойбулакский» племзавод ден Марий кугыжаныш университетын лектышыштым ужаш лиеш.

Л.ШАБДАРОВА.

 

 

Опубликовать в Одноклассники

Добавить комментарий