ТАЗАЛЫК

Марий Элыште – кӱкшӧ технологий-влак

2014 ий гыч Марий Элыште кӱкшӧ технологиян медицине полышым Российын федеральный рӱдерже-влак веле огыл, регионыштына верланыше медицине организаций-шамычат пуат.

Кӱкшӧ медицине технологий разделыште республикысе калык лачшымак могай полышым да кузе налын кертеш? Тиде да моло йодышым Обязательный медицине страхований фондын Марий Элысе организаций пӧлкажын начальникше О.Заеван полшымыж дене рашемдена.

Ольга Анатольевна, умылтарыза, пожалуйста, могай медицине полыш кӱкшӧ технологиянлан шотлалтеш?

– Кӱкшӧ технологиян медицине полыш – тиде специализироватлыме медицине полышын ужашыже. Тыгодым вийжым, пайдажым научнын пеҥгыдемдыме у, сложный да шуэн вашлиялтше (уникальный), кугу ресурсан йӧн-влак, генный инженерийын методшо ден клетке кӱкшытын технологийже-шамыч, кызытсе жаплан келшыше оборудований ден материал-влак кучылталтыт. Пытартыш ийлаште вӱрым шагалрак йомдарыман, тазалыклан шагалрак нелылыкым ыштыман инвазивный огыл (коваште вошт пурымо дене кылдалтын огыл) да изи инвазивный хирургический операций-влак кумдан шарленыт. Тыгодым пациент стационарыштат ончычсо гай кужун ок эмлалт. Адакше нине операций деч вара айдемын тазалыкше писынрак пеҥгыдемеш.

– Кӱкшӧ технологиян медицине полыш черле-влаклан яра пуалтеш мо?

– Тыге, яра. Полышым пуымо тиде вид дене граждан-влак ОМС-ын полисше почеш пайдаланен кертыт. 2014 ий марте тыгай сынан полышлан окса федеральный бюджет гыч ойыралтын. Вара кӱкшӧ технологиян полышым кок тӱҥ ужашлан пайленыт, да тудо ик велым Обязательный медицине страхованийын федеральный фондшо кӱшеш (рашемденрак каласаш гын, тудым ОМС-ын кугыжаныш программышкыже пуртеныт) финансироватлалташ тӱҥалын, вес велым – тӱрыснек федеральный бюджет кӱшеш. Тыгеже калыклан тиде полыш дене утларак пайдаланаш йӧн ешаралтын, да госпитализацийым вучымо жапат кӱчыкемын.

2018 ий гыч кӱкшӧ технологиян чыла полышым Обязательный медицине страхованийын федеральный фондшын бюджетше гыч веле финансироватлаш тӱҥалыныт: ОМС-ын базовый программыжын ужашышкыже пурышо кӱкшӧ технологиян медицине полышлан средства верысе фонд-влаклан субвенцийын составше дене колталтеш, а кугыжаныш программыш пурыдымо кӱкшӧ технологиян медицине полышым тичмашнек федеральный кугыжаныш тӧнеж финансироватла.

ОМС-ын базовый программышкыже пуртымо кӱкшӧ технологиян медицине полышым ОМС системыште участвоватлыше специальный лицензиян организацийлаште налаш лиеш. ОМС-ын базовый программышкыже пуртыдымо кӱкшӧ технологиян медицине полыш специальный квото почеш ойыралтеш.  

– ОМС-ын базовый программышкыже пуртымо кӱкшӧ технологиян медицине полышым Марий Элыште могай организаций-влак пуат?

– Регионыштына тиде пашан видшылан икымше лицензийым Республикысе клинический эмлымвер налын да кӱкшӧ технологиян икымше операций-влакым кутан-эрде йыжыҥыш эндопротезированийым ыштыме дене тӱҥалын. Таче Марий Элыште ОМС-ын базовый программышкыже пуртымо кӱкшӧ технологиян медицине полышым индеш организаций пуа, тиде – Республикысе клинический эмлымвер, Йошкар-Оласе эмлымвер, Волжск оласе рӱдӧ эмлымвер, Республикысе йоча клинический эмлымвер, 1-ше №-ан медсанчасть, Республикысе онкодиспансер, Йошкар-Оласе йоча эмлымвер, Перинатальный рӱдер, Сарын ветеранже-влакын республикысе госпитальышт. Нине организаций-влак кӱкшӧ технологиян медицине полышым шӱм-вӱргорно, пуалше (онкологий) чер, сакыр диабет тургыжландарыме, нелын сусыргымо да эше шуко моло годым пуат. Кӱкшӧ технологиян медицине полышын кугурак ужашыже жап деч ончыч шочшо аза-влакым ончен лукташ логалеш. Тений ОМС-ын базовый программышкыже пуртымо 524 йӧнжӧ гыч шӱдӧ утлаже шукталтеш. 

Ольга Анатольевна, кӱкшӧ технологиян медицине полышлан направленийым кушто налман?

– Кӱкшӧ технологиян медицине полышым налашлан направленийым ойырымо порядкым Российын да Марий Эл Республикын Тазалыкым аралыме министерствышт пеҥгыдемденыт. Тыгай сынан полышым налшашлан медицине показаний лийшаш, тудыжым диагностикым да эмлыме процедурым эртыме медицине организацийын врачше палемда. Тиде показанийым медорганизацийын врач комиссийже решенийже дене пеҥгыдемда. Вараже тудын негызеш протокол ышталтеш, а решений пациентын медицине документышкыже пурталтеш. Тыге, эмлыше врач госпитализацийлан направленийым пуа, а организацийым вуйлатыше але тудлан уполномоченный пашаеҥ кум паша кече жапыште тиде документым специализироватлыме информаций системе, почто але электрон кыл полшымо дене пациентым эмлалташ колтымо медицине организацийыш кусара. Ямде документ пакетым пациент шкежат але тудын закон дене палемдыме еҥже кӱкшӧ технологиян медицине полышым пуышо организацийыш конден кертыт.

Пациентым госпитализироватлыме негызлан черлым эмлалташ колтымо организацийын кӱкшӧ технологиян медицине полышым пуышашлан пациент-влакым ойырымо шотышто врач комиссийжын решенийже шотлалтеш. Комиссий медицине показаний уло-уке але пациентым госпитализироватлашлан чарак улмо шотышто решенийым кӱкшӧ технологиян медицине полышлан талоным оформитлыме деч вара шым паша кече жапыште луктеш.

Пациент палемдыме госпитализаций нерген уверым эмлалташ колтышо медорганизаций гоч кидышкыже налеш.

Кӱкшӧ технологиян медицине полышын результатше негызеш пациентлан ончыкыжымат эскералтме але эмлалтме да реабилитацийым эртыме шотышто темлымаш пуалтеш, тидыже тудын медицине документацийыштыжат ончыкталтеш.

– Республикысе медицине организацийлашке, кӱкшӧ технологиян медицине полышым йодын, шуко пациент толеш?

– 2017 ийыште кӱкшӧ технологиян медицине полышым пуымо кышкарыште Марий Элыште илыше 4200 еҥ кӱлешан полышым федеральный да республик кӱкшытыштӧ налын. Тиде чот гыч 53,5 процент пациент (2245 еҥ) республикыштак эмлалтын. 2018 ийын икымше пелыштыже Марий Элыште кӱкшӧ технологиян 900 утла полышым пуымо, 270 утла еҥ тудым республик деч ӧрдыжтӧ налын.

– Лудшына-влакын кӱкшӧ технологиян медицине полышым налме шотышто йодышышт лектеш гын, тудым кушто рашемдаш лиеш?

– Чыла йодышым страховатлалтме страховой медицине организацийыште рашемдаш лиеш. Тыгак Марий Эл Республикыште  Обязательный медицине страхований сферын контакт-рӱдержын 8-800-707-83-81 телефонышкыжо йыҥгырташ йӧн уло. Тылеч посна кӱкшӧ технологиян медицине полышым пуышо организаций-влак нерген тӱрлӧ уверым ОМС-ын верысе фондшын сайтыштыже муаш лиеш.

М.ИВАНОВА

Опубликовать в Одноклассники

Добавить комментарий