Медицине услуго-влакым сайынрак пуышашлан Козьмодемьянск олаште, Курыкмарий да Юрино районлаште илыше 50 тӱжем утла еҥым обслуживатлыше Козьмодемьянскысе район-влак кокласе эмлымверым тӱрлӧ оборудований дене шукертак уэмдаш кӱлын. РФ Президентын Резерв фондшо гыч ойырымо окса полшымо дене эмлымверым кызытсе жаплан келшыше у медицине технике дене шыҥдарыме. Компьютер томографым, шодым искуственно вентилироватлыше аппаратым, кардиомонитор-влак комплексым, цифровой флюорографым да моло оборудованийым чылаже 55 миллион теҥге нарылан налме. Нуным шындымылан кок тылзе утларак жап веле эртен гынат, таче кечылан кажне аппарат дене 1000 утла шымлымашым эртарыме.
Кодшо тылзын Козьмодемьянск олаш паша дене миен коштмыж годым Марий Элыште тӱҥ федеральный инспектор Петр Журавлев эмлымверышкат пурен лектын да у оборудований-влакын пашаштым, калыклан медицине полышым пуымо йӧным сай велым аклен.
М.ИВАНОВА.
